नेतृत्व र उद्यमशीलता विकास सम्मेलन हुने

शिक्षा

नेतृत्व र उद्यमशीलता विकास सम्मेलन हुने

हिमालखबर बुधबार, जेठ ९, २०८१

त्रिभुवन विश्वविद्यालयबाट सम्बन्धनप्राप्त पिपल्स क्याम्पसले नेतृत्व, उद्यमशीलता र व्यवसाय प्रवर्द्धनकेन्द्रित दुईदिने सम्मेलन गर्ने भएको छ।

सम्मेलनमा सरकारी, सामुदायिक र निजी क्याम्पस तथा अनुसन्धानकर्मी गरी १०० जनाभन्दा बढीको सहभागिता रहने क्याम्पस प्रमुख मनोज कुँवरले बताए। विश्वविद्यालय अनुदान आयोगको सहयोगमा पिपल्स क्याम्पसले जेठ १० र ११ गते गर्न लागेको राष्ट्रिय व्यवस्थापन सम्मेलनमा चार जना विज्ञको विशेष प्रवचन रहनेछ।

‘नेपालमा व्यवसायको सम्भावना र चुनौती’ विषयमा सहप्राध्यापक डा. प्रकाश गौतमको विशेष प्रवचन हुनेछ भने सहप्राध्यापक डा. जितेन्द्र डंगोलले ‘प्राज्ञिक क्षेत्रमा उद्यमशीलता प्रवर्द्धन’ शीर्षकमा बोल्नेछन्। त्यस्तै, ‘सक्रिय सिकाइ विधि’ विषयमा प्राध्यापक डा. अह्रन स्थापितको प्रस्तुति हुनेछ भने प्रा.डा. सुशीलभक्त माथेमाले ‘शैक्षिक उन्नयनका लागि रणनीतिक व्यापार व्यवस्थापन’ शीर्षकमा प्रस्तुति दिनेछन्।

प्राध्यापनमा संलग्न सहकर्मीलाई एमफील, पीएचडी वा अन्य थप अनुसन्धानका लागि अभिमुखीकरण गर्न सम्मेलन आयोजना गर्न लागिएको क्याम्पस प्रमुख कुँवरले बताए।