विद्यार्थीबीच भौतिक विज्ञान सम्बन्धी प्रतियोगिता हुने

शिक्षा

विद्यार्थीबीच भौतिक विज्ञान सम्बन्धी प्रतियोगिता हुने

हिमालखबर आइतबार, फागुन २०, २०८०

विज्ञानका समस्या समाधान गर्न इच्छुक विद्यार्थीका लागि भौतिक विज्ञान सम्बन्धी प्रतियोगिता हुने भएको छ।

नेपाल एस्ट्रोनोमिकल सोसाइटीको आयोजनामा ‘नेपाल यङ फिजिसिस्ट टुर्नामेन्ट’ हुन लागेको हो। यसमा कक्षा १० वा १२ सम्मको पढाइ सकेर विश्वविद्यालय भर्ना नभएका विद्यार्थीले प्रतिस्पर्धा गर्न पाउनेछन्।

विद्यार्थीलाई वैज्ञानिक अनुसन्धानको प्रक्रिया सिकाउने लक्ष्य राखेको प्रतियोगिता आयोजना गर्न लागिएको नेपाल एस्ट्रोनोमिकल सोसाइटीका अध्यक्ष सुरेश भट्टराईले बताए। “प्रतियोगिताले विद्यार्थीलाई कुनै पनि वैज्ञानिक समस्या समाधानका लागि कस्तो प्राज्ञिक अभ्यास अपनाउनुपर्छ भन्ने सिकाउनेछ,” भट्टराईले भने।

यससँगै अन्तर्राष्ट्रिय प्रतियोगितामा सहभागिताका लागि निखारिने मौका पाउने उनको भनाइ छ। प्रतियोगिताका विजेताले अन्तर्राष्ट्रिय प्रतियोगितामा भाग लिने अवसर पाउनेछन्।

यसका लागि सोसाइटीले निवेदन आह्वान गरेको छ। चैत ७ गतेसम्म अनलाइन मार्फत निवेदन दिन सकिनेछ। दुई महीनाभित्रै प्रतियोगिता हुने जनाइएको छ।