इन्जिनीयरिङ अध्ययन संस्थानद्वारा शुल्कवृद्धि

शिक्षा

इन्जिनीयरिङ अध्ययन संस्थानद्वारा शुल्कवृद्धि

हिमालखबर आइतबार, असोज २१, २०८०

त्रिभुवन विश्वविद्यालय इन्जिनीयरिङ अध्ययन संस्थानले शुल्कवृद्धि गरेको छ।

संस्थानले सूचना प्रकाशित गरी शुल्कवृद्धि गरिएको जनाएको छ। शुल्कवृद्धिसँगै प्रवेश परीक्षा पनि हुने भएको छ।

त्रिवि इन्जिनीयरिङ संस्थान डीनको कार्यालयले जारी गरेको सूचनामा स्नातक तहमा शुल्कवृद्धि गरिएको जनाएको छ। संस्थानले चार वर्षका लागि चार लाख ९० हजार शुल्क तोकेको छ। यसअघि तीन लाख १८ हजार रुपैयाँ थियो।

इन्जिनीयरिङ अध्ययन संस्थान कार्यान्वयन समितिको २०८० असोज १९ गतेको बैठकले शुल्कवृद्धिको निर्णय गरेको हो। समितिको निर्णय नंं. २८७९ अनुसार चार वर्षको धरौटी सहित नियमित तर्फ ५६ हजार ७०० रुपैयाँ, पूर्ण शुल्कीयतर्फ चार लाख ९० हजार रुपैयाँ र विदेशी विद्यार्थीको हकमा १३ लाख १३ हजार ५०० रुपैयाँ शुल्क कायम गरिएको संस्थानले जनाएको छ।

यसअघि शुल्कवृद्धि गरेर सात लाख ७५ हजार ४२० रुपैयाँ बनाइएको थियो। विद्यार्थीले विरोध गरेपछि शुल्कवृद्धिको निर्णय स्थगन गरिएको थियो।

विद्यार्थी आन्दोलनका कारण रोकिएको प्रवेश परीक्षा पनि अर्को महीना हुने भएको छ। कात्तिक १४ गतेदेखि प्रवेश परीक्षा हुने संस्थानले जनाएको छ।