शुल्क बढाउन इन्जिनीयरिङ अध्ययन संस्थानले बनायो पुनरावलोकन समिति

त्रिभुवन विश्वविद्यालयको इन्जिनीयरिङ अध्ययन संस्थान (आईओई)ले शुल्क बढाउन पुनरावलोकन समिति गठन गरेको छ।

यसअघि साउन २५ गते आईओईले शुल्क बढाएको थियो। उक्त कार्यको सबै विद्यार्थी संगठनले विरोध गरेका थिए। विद्यार्थी अनशनमा समेत बसेका थिए।

त्यसपछि आईओईले शुल्क वृद्धिको निर्णय फिर्ता लिएको थियो। विद्यार्थीसँगको सहमतिपछि आन्दोलन पनि स्थगन भएको थियो।

लामो समयदेखि शुल्क नबढेकाले पुनरावलोकन गर्न समिति गठन गरिएको आईओईले जनाएको छ। आईओईका डीन प्राध्यापक शशीधरराम जोशीले सहप्राध्यापक हरिराम पराजुलीको नेतृत्वमा ११ सदस्यीय शुल्क पुनरावलोकन समिति गठन गरिएको जनाएका छन्।

पुल्चोक क्याम्पसका सहप्राध्यापक पराजुलीको संयोजकत्वमा गठित समितिमा पुल्चोक क्याम्पसबाट सहप्राध्यापक नारायणप्रसाद गौतम र सहप्राध्यापक सञ्जीवप्रसाद पाण्डे सदस्य छन्। त्यस्तै, थापाथली क्याम्पसबाट उपप्राध्यापक सुदीप शर्मा पौडेल, प्राध्यापक संघ पुल्चोक क्याम्पस एकाइ समितिका सभापति प्रा.डा. हेमराज पन्त, कर्मचारी संघ थापाथली एकाइ समितिका सभापति ईश्वर कार्की सदस्य छन्।

यसैगरी विद्यार्थीबाट पुल्चोक क्याम्पस स्ववियू अध्यक्ष विराज अर्याल, थापाथली क्याम्पस अध्यक्ष पुष्कर विक्रम शाही, पूर्वाञ्चल क्याम्पस अध्यक्ष नवीन श्रेष्ठ, पुल्चोक क्याम्पसका सचिव विज्ञान प्रधान सदस्य छन्। आईओई डीनको कार्यालयका विदुर ढकाल सदस्य-सचिव रहेका छन्।

समितिलाई सात दिनभित्र शुल्क पुनरावलोकन सम्बन्धी प्रतिवेदन बुझाउन समय दिइएको छ।