त्रिविमा चैत ५ गते स्ववियु निर्वाचन गर्न सिफारिश

शिक्षा

त्रिविमा चैत ५ गते स्ववियु निर्वाचन गर्न सिफारिश

हिमालखबर बिहीबार, २१ पुस, २०७९

त्रिभुवन विश्वविद्यालय विद्यार्थी कल्याण परिषद्ले आगामी चैत ५ गते स्वतन्त्र विद्यार्थी युनियनको चुनाव गर्न सिफारिश गरेको छ।

बिहीबार बसेको परिषद्को बैठकले स्ववियु निर्वाचनका लागि त्रिवि कार्यकारी परिषद्लाई सिफारिश गर्ने निर्णय गरेको विद्यार्थी कल्याण तथा खेलकूद निर्देशनालयका निर्देशक पशुपति अधिकारीले बताए। “सबै विद्यार्थी संगठनको सल्लाह र परीक्षा, भर्ना कार्यतालिकालाई असर नपर्ने गरी हामीले त्रिवि कार्यकारी परिषद्लाई निर्वाचन गर्न सिफारिश गरेका छौं,” अधिकारीले भने, “अब चाँडै नै त्रिवि कार्यकारी परिषद्को बैठकले हामीले तय गरेको मितिलाई अनुमोदन गर्नेछ।”

त्रिवि कार्यकारी परिषद्को बैठकले स्ववियु निर्वाचन केन्द्रीय अनुगमन समन्वय समिति बनाउने उनले जानकारी दिए। त्रिविमा विगत लामो समयदेखि स्ववियु निर्वाचन हुन सकेको छैन। त्रिविले स्ववियु निर्वाचनबारे पुस ११ गते सबै विद्यार्थी संगठनका अध्यक्षसँग छलफल गरेको थियो।

निर्देशनालयका निर्देशक अधिकारीले सबै संगठनले स्ववियु निर्वाचनमा सहमति जनाएकाले मिति तोकी सिफारिश गरिएको बताए। त्रिविले यसअघि त्रिवि पदाधिकारी, विभाग, संस्थान, नौ वटै संकायका डीन र परीक्षा नियन्त्रकसँग पनि स्ववियु निर्वाचनका सम्बन्धमा छलफल गरिसकेको छ।

त्रिविमा ६२ आङ्गिक र एक हजार ४० सम्बन्धनप्राप्त क्याम्पस छन्। स्ववियु निर्वाचनमा २८ वर्ष उमेर हदबन्दी र मिश्रित निर्वाचन प्रणाली लागू गरिएको छ। उमेर हदबन्दी र मिश्रित निर्वाचन प्रणाली लागू भएपछि पछिल्लो पटक २०७३ सालमा आंशिक रूपमा केही क्याम्पसमा स्ववियु निर्वाचन भएको थियो।