अमेरिका धेरै विद्यार्थी पठाउनेमा नेपाल १२औं स्थानमा, १२ हजार अध्ययनरत

शिक्षा

अमेरिका धेरै विद्यार्थी पठाउनेमा नेपाल १२औं स्थानमा, १२ हजार अध्ययनरत

हिमालखबर मंगलबार, कात्तिक २९, २०७९

अमेरिकामा धेरै विद्यार्थी पठाउने मुलुकमध्ये नेपाल १२औं स्थानमा परेको छ। सन् २०२१/२२ मा अमेरिकामा ११ हजार ७७९ नेपाली विद्यार्थी अध्ययनरत रहेको अमेरिकाको अन्तर्राष्ट्रिय शैक्षिक संस्थानले सार्वजनिक गरेको तथ्यांकमा छ।

ओपन डोर्स रिपोर्ट सन् २०२१/२२ का अनुसार, यो अघिल्लो वर्षका तुलनामा ५.६ प्रतिशतको वृद्धि हो। कोभिड–१९ महामारीको प्रभाव मत्थर भएसँगै अमेरिका पढ्न जाने नेपाली विद्यार्थीको संख्यामा बढोत्तरी भएको हो।

अमेरिकामा संसारभरिका २ सय देशका ९ लाख ४८ हजार विद्यार्थी अध्ययनरत छन्। यसमध्ये १.२४ प्रतिशत विद्यार्थी नेपाली छन्। महामारीको प्रभाव मत्थर भएसँगै अमेरिकामा विदेशी विद्यार्थीको संख्या उल्लेख्य बढेको थियो। अमेरिकाका विश्वविद्यालय र शैक्षिक संस्थामा भर्ना भएकामध्ये ९० प्रतिशतले भौतिक उपस्थितिमै कक्षा लिइरहेको प्रतिवेदनले जनाएको छ।

सबैभन्दा धेरै अमेरिकामा चीनका २ लाख ९० हजार विद्यार्थी अध्ययनरत छन्। त्यसपछि भारतका १ लाख ९९ हजार, दक्षिण कोरियाका ४१ हजार, क्यानडाका २७ हजार तथा भियतनामका २१ हजार विद्यार्थी अध्ययनरत छन्। अमेरिकामा अध्ययनरतमध्ये भारतबाट दक्षिण एशियाबाट सर्वाधिक विद्यार्थी हुने देशमा नेपाल पर्छ।

अन्तर्राष्ट्रिय विद्यार्थीबाट अमेरिकाले ३२ अर्ब अमेरिकी डलर बराबरको लाभ पाएको प्रतिवेदनमा उल्लेख छ।