खेलकुदशुक्रबार, २२ कार्तिक , २०७६

प्रथम श्रेणी क्रिकेटमा सन्दीप लामिछानेको शानदार डेब्यू, अन्यको निराशाजनक (भिडियो सहित)

हिमालखबर

प्रथम श्रेणीको क्रिकेटमा नेपालले पहिलो हार बेहोरेको छ । राष्ट्रिय टीमका नौ खेलाडीको डेब्यू रहेको तीन दिवसीय क्रिकेटमा नेपाल मेरिलिबोन क्रिकेट क्लब (एमसीसी) सँग २०८ रनले पराजित भएको छ ।

कप्तान ज्ञानेन्द्र मल्ल, उपकप्तान दीपेन्द्रसिं ऐरी सहित नौ खेलाडीको डेब्यू रहेको खेलमा नेपालका ब्याटिङ लाइन चल्न सकेनन् । मल्ल, ऐरी, विनोद भण्डारी, आरिफ शेख लगायतको डेब्यू निराशाजनक रह्यो ।

तस्वीरः बिक्रम राई

 

छोटो फर्म्याटको अन्तर्राष्ट्रिय फ्रेञ्चाइजीका अनिवार्य सदस्य बनिसकेका सन्दीप लामिछानेको डेब्यू भने शानदार रह्यो । लेग स्पिनर सन्दीपले अलराउण्डर प्रदर्शन देखाए ।

प्रतियोगितामा सन्दीपले चार विकेट लिए भने ६४ रन जोडे । पहिलो दिन एमसीसीले ३६४ रन बनाउदा सन्दीपले तीन विकेट लिएका थिए । जवाफी ब्याटिङमा नेपालका लागि मल्ल, ऐरी, राजु रिजाल, शरष भेषावाकर लगायतले निराशाजनक प्रदर्शन गरे ।

फटाफट विकेट गुमिरहेका बेला बिनोद भण्डारीले ३६ रन बनाएका थिए । तर, दशैं नम्बरमा आएका सन्दीपले एकपछि अर्को बाउण्ड्री गरे । उनले चार छक्का र दुई चौकाको मद्दतमा २१ बलबाटै ३९ रन जोड्दै बिस्फोटक ब्याटिङ गरे । तर, ललितनारायण राजवंशी एलबीडब्लु भए पछि सन्दीप नटआउट पेभेलियन फर्किदा नेपालको १५३ रन मात्रै बन्यो ।

दोस्रो इनिङमा एमसीसीले १८१ रन जोड्न सन्दीपले एक विकेट लिए । सन्दीपले यो इनिङको ब्याटिङमा फेरि अघिल्लो दिनकै झल्को दिए । उनले २५ रन जोडे । तर, दोस्रो इनिङमा समेत १८४ रनमै नेपाल अलआउट भए पछि एमसीसी विजयी भयो ।

यसअघि तीन दिवसीय खेलिसकेका शरद भेषवाकरले प्रदर्शन समेत राम्रो नहुँदा अनुभवी अलराउण्डर सोमपाल कामीले भने अर्धसतक सहित नेपालका लागि उच्च स्कोर जोडे । तीन विकेट लिएका सोमपालले ७५ रन जोडेका थिए । राष्ट्रिय टीममा सोमपाल र शरद मात्रै तीन दिवसीय खेलिसकेका खेलाडी थिए ।

एमसीसी विरुद्धकै खेलबाट कप्तानी भूमिकामा आएका मल्लका लागि भने डेब्यू खेल सन्तोषजनक रहेन । पहिलो इनिङमा खाता खोल्न नसकेका कप्तान मल्लले दोस्रो इनिङमा ६ रन मात्रै जोडे । डेब्यू खेलका क्रममा उपकप्तान ऐरीले दुई इनिङमा जम्मा एक रन जोडे ।

अर्का अलराउण्डर करण केसीले रन नजोडे पनि ६ विकेट लिए । उनले पहिलो र दोस्रो इनिङमा समान तीन/तीन विकेट लिएका थिए । नेपाल भ्रमणमा रहेको एमसीसी सँगको हार नेपालका लागि प्रथम श्रेणीको पहिलो हार समेत बन्यो ।

 

नेपालले पछिल्लोपटक आइसीसी इन्टरकन्टिनेन्टल कप २००५ मा युएईविरुद्ध घरेलु मैदानमा तीन दिवसीय खेल खेलेको थियो । उक्त खेलमा नेपाल १७२ रनले विजयी भएको थियो ।

त्यसअघि सोही प्रतियोगिता अन्तर्गत किर्तिपुरमै भएको हङकङसँगको खेल भने बराबरीमा सकिएको थियो ।

त्यसअघि आइसीसी इन्टरकन्टिनेन्टल कप २००४ अन्तर्गत पनि नेपालले दुई खेल खेलेको थियो । ती मध्ये सारजाहमा भएको युएईविरुद्धको खेल बराबरीमा सकिएको थियो । किर्तिपुरमा भएको मलेसियाविरुद्धको खेलमा भने नेपाल ९ विकेटले विजयी भएको थियो ।

 

याे पनि

प्रथम श्रेणीको क्रिकेटमा नेपालको पहिलो हार

नेपाल प्रथम श्रेणी क्रिकेटमा अपराजित देश

पहिलो श्रेणीको क्रिकेटको पहिलो सेसनः नाराबाजी गर्नेदेखि नेपाल नै नचिन्ने दर्शक

ज्ञानेन्द्रले कप्तानी गरेको पहिलो खेलमै नेपालको जित, विनोद र पवनको उत्कृष्ट प्रदर्शन

 

प्रतिकृया दिनुहोस