कला/साहित्य आइतबार, मंसिर १, २०७६

फिल्म साउथएशियामा ‘ब्याम्बो स्टोरिज्’ उत्कृष्ट

हिमालखबर

बांग्लादेशका बाँस व्यापारका जोखिमबारे बनेको वृत्तचित्र ‘ब्याम्बो स्टोरिज्’ लाई उत्कृष्ट घोषित गर्दै ललितपुरको पाटनढोकास्थित यलमाया केन्द्रमा जारी चारदिने वृत्तचित्र महोत्सव ‘फिल्म साउथएसिया, २०१९’ सकिएको छ ।

शाहीन दिल्ली–रियाज निर्देशित यो वृत्तचित्रले रामबहादुर ट्रफीसहित दुई हजार अमेरिकी डलरको पुरस्कार प्राप्त गरेको छ ।

महोत्सवमा दोस्रो पुस्कार ‘स्क्र्याचेज अन स्टोन’ले जितेको छ । नागाल्याण्डका आदिवासी, सशस्त्र युद्ध र परिवर्तित जीवनमा आधारित यस वृत्तचित्रलाई अमित महन्तीले निर्देशन गरेका हुन् । पुरस्कृत यो वृत्तचित्रले एक हजार डलर प्राप्त गरेको छ ।

डेब्यू निर्देशकलाई दिइने एकहजार डलरको तारेक मसुद पुरस्कार इटालीका सिमोनी मेस्त्रोनीले पाए । उनको वृत्तचित्र ‘आफ्टर प्रेयर्स’ भारतको कश्मीरवासीको आशा, निराशामा केन्द्रित थियो ।

निर्णायक ‘स्पेशल मेन्सन’मा हेमन्तकुमार गाबाको ‘एन इन्जिनियर्ड ड्रिम’, सुप्रियो सेनको ‘स्विमिङ थ्रु द डार्कनेस्’, जेस अल्कको ‘परिहा डग’ छानिएका छन् ।

विद्यार्थी विधाका उत्कृष्ट वृत्तचित्रमा नेपालका आशीष लिम्बू र देविन राई निर्देशित ‘द विन्टर ट्याप’, भारतकी ऐश्वर्या ग्रोबरको ‘मेमोरिज अफ साइरा एन्ड सलिम’ पुरस्कृत भएका छन् । दुवैलाई जनही ५ सय डलर र फिल्म साउथएशिया २०१९ थान्काद्वारा पुरस्कृत गरिएको छ ।

बालबालिकाको विषयकेन्द्रित युनिसेफ उत्कृष्ट वृत्तचित्र अफगानिस्तानका अबोजार अमिनी निर्देशित ‘काबुल, सिटी इन द विन्ड’ ले पाएको छ । यस वृत्तचित्रले पनि हजार डलर र प्रमाणपत्र प्राप्त गरेको छ ।

महोत्सवको १२ औं संस्करणमा पत्रकार कुन्द दीक्षित, भारतकी भिजुअल आर्टिस्ट आयशा अब्राहम र श्रीलंकाकी चलचित्रकर्मी सुमाथी शिवामोहन निर्णायक रहेका थिए ।

 

प्रतिकृया दिनुहोस