लोक सेवाको तयारी कक्षा पढाउँदै स्थानीय सरकार

शिक्षा

लोक सेवाको तयारी कक्षा पढाउँदै स्थानीय सरकार

हिमालखबर बुधबार, २२ चैत, २०७९

बाग्लुङको काठेखोला गाउँपालिका–३, धम्जाका विद्यार्थीलाई निःशुल्क लोक सेवा तयारी कक्षा पढाउन थालिएको छ।

वडाभित्रका विद्यार्थीलाई सदरमुकाम बाग्लुङ बजारमा निःशुल्क तयारी कक्षा बढाउन थालिएको हो। युवालाई स्वालम्बी बन्न उत्प्रेरित गर्न र सरकारी सेवामा पहुँच वृद्धि गराउन तयारी कक्षा शुरू गरिएको वडाध्यक्ष कुलबहादुर विकले बताए।

धम्जाका २० जना विद्यार्थीलाई सदरमुकाममा राखेर लोक सेवासँगै शिक्षक सेवा आयोगको परीक्षाको तयारी गराइनेछ। उनीहरू दुई महीनासम्म सदरमुकामै बसेर तयारी गर्नेछन्।

“अति विपन्न परिवारका विद्यार्थीलाई दुई महीनासम्म आवासीय व्यवस्था गरेका छौं,” वडाध्यक्ष विकले भने। उनीहरूको दुई महीनाको तयारी कक्षाका लागि वडा कार्यालयले दुई लाख रुपैयाँ छुट्याएको छ।

लोक सेवाका तयारी कक्षा चैत २१ गतेदेखि शुरू भएका छन्। वडा कार्यालयले हेमन्त मल्टिएजुकेशनल सर्भिससँगको सहकार्यमा पढाउन शुरू गरेको हो।

तयारी कक्षाको उद्घाटन कार्यक्रममा उपस्थित गाउँपालिका अध्यक्ष राज थापाले सरकारी सेवामा पहुँच बढाउन यसले सहयोग गर्ने बताए। यसबाट सकारात्मक प्रतिफल आउने विश्वास गर्दै गाउँपालिका अध्यक्ष थापाले अन्य वडामा पनि अनुसरण गरिने बताए।