यौन दुर्व्यवहारको आरोप लागेका दुई शिक्षक प्रहरीको नियन्त्रणमा
छात्रामाथि यौन दुर्व्यवहार गरेको आरोप लागेका दुई जना शिक्षकलाई मकवानपुर प्रहरीले नियन्त्रणमा लिएको छ।
मकवानपुरको बागमती गाउँपालिका-८, शान्तिपुरस्थित जनता माविका तीन जना शिक्षकमाथि यौन दुव्र्यवहारको आरोप लागेको थियो। उनीहरूमध्ये दुई जनालाई शुक्रबार नियन्त्रणमा लिएको जिल्ला प्रहरी कार्यालयले जनाएको छ।
गएराति आरोपित शिक्षकद्वय लोकबहादुर विक र रुद्रबहादुर विकलाई जिल्ला प्रहरी कार्यालय, हेटौंडा ल्याइएको छ। अर्का हेमबहादुर विक भने २५ चैतमा आफै प्रहरीको सम्पर्कमा आएका थिए।
तीनै जनामाथि अनुसन्धान भइरहेको जिल्ला प्रहरी कार्यालय, मकवानपुरका प्रवक्ता टेकबहादुर कार्कीले बताए।
शिक्षकहरूले दुव्र्यवहार गरेको भन्दै छात्राले प्रहरीमा उजुरी दिएका थिए। स्थानीय बासिन्दाले गाउँमै मिलाउन खोजेपछि उनीहरू गत २४ चैत राति उजुरी दिन जिल्ला प्रहरी कार्यालय पुगेका थिए।