कला/साहित्य सोमबार, वैशाख १, २०७७

बन्दाबन्दीले छेक्न नसकेको ‘भर्चुअल लिटरेचर फेस्टिभल’

हिमालखबर

बन्दाबन्दीले छेक्न नसकेको ‘भर्चुअल लिटरेचर फेस्टिभल’

किताब यात्रा फाउन्डेसनको आयोजनामा सोमबारबाट ‘भर्चुअल लिटरेचर फेस्टिभल–किताब जात्रा २०२०’ सुरु भएको छ । कोभिड–१९ संक्रमणको जोखिमका कारण बन्दाबन्दी भइरहेको स्थितिमा सिर्जनशील बनिरहन उत्प्रेरित गर्ने उद्देश्यका साथ फेस्टिभल सुरु गरिएको फाउन्डेसनका अध्यक्ष ऋषिराम अधिकारीले जानकारी दिए ।

‘काठमाडौंमा किताब जात्रा सम्पन्न गरिसकेपछि हामी सातै प्रदेशमा जाने योजना बनाइरहेका थियौं । त्यसैबेला महामारीको संकट आइलाग्यो । यो समयमा सिर्जनशील बनिरहन यस्तो भर्चुअल छलफलले सहयोग पुग्ने देखेर फेस्टिभल गरेका हौं’, फेस्टिभल डाइरेक्टरसमेत रहेका अधिकारीले भने ।

फेस्टिभलको पहिलो दिन दुई सत्रमा बहस हुने सेसन संयोजक शकुन्तला जोशीले बताइन् । उनका अनुसार पहिलो सेसनमा ‘आख्यानको अभिभारा’ शीर्षकमा आख्यानकारहरू युग पाठक, अमर न्यौपाने र मनिषा गौचनले छलफल गरेका छन् ।

निरुपा प्रसुनले सहजीकरण गर्ने सत्र दिउँसो १ बजे लाइभ भइसकेको छ । त्यसको रेकर्ड किताब जात्राको फेसबुक पेजमा जुनसुकै बेला हेर्न सकिनेछ ।

त्यस्तै, दोस्रो सत्रमा रङ्गकर्मी अनुप बराल, सरिता गिरी र केदार श्रेष्ठले ‘भर्चुअल मिडियामा रङ्गमञ्च’ शीर्षकमा बहस गर्नेछन् । कला अनुरागीले सहजीकरण गर्ने सत्र अपरान्ह चार बजे लाइभ हुनेछ ।

छलफलहरू किताब जात्राको फेसबुक पेज facebook.com/kitabjatra बाट लाइभ हेर्न सकिनेछ । फेस्टिभल एक सातासम्म चल्नेछ ।

प्रतिकृया दिनुहोस