महाअभियोगका पक्षमा लाग्न माओवादी केन्द्रका सांसदलाई निर्देशन
नेकपा माओवादी केन्द्रले अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीविरुद्ध संसद्मा दर्ता भएको महाअभियोगका पक्षमा लाग्न सांसदहरुलाई निर्देशन दिएको छ ।
संसद् भवन नयाँ बानेश्वरमा ७ कार्तिकमा बसेको माओवादी केन्द्र संसदीय दलको बैठकमा प्रधानमन्त्री तथा पार्टी अध्यक्ष पुष्पकमल दाहालले पार्टीका सांसदलाई महाअभियोग अघि बढाउन निर्देशन दिएको नेता अग्नि सापकोटाले जानकारी दिए ।
माओवादी केन्द्रको केन्द्रीय कार्यालयको ६ कात्तिकमा बसेको बैठकले महाअिभयोगसम्बन्धी निर्णय गर्ने अधिकार पार्टी अध्यक्ष दाहाललाई दिएको थियो ।
सोही अनुरुप आफूले सत्तारुढ नेपाली काँग्रेसका सभापति शेरबहादुर देउवा लगायत विभिन्न पार्टीका नेतासँग छलफल अघि बढाएको बैठकमा अध्यक्ष दाहालले जानकारी दिए ।
अध्यक्ष दाहालले वैधानिक रुपमा दर्ता भएको महाअभियोगका पक्षमा एक भएर अघ्न बढ्न बैठकमा सांसदहरुलाई आग्रह गरे ।रासस