समाचार मंगलबार, साउन १८, २०७३

प्रस्तावित पाँच राजदूतको संसदीय सुनुवाइ

हिमालखबर

व्यवस्थापिका–संसद्, संसदीय सुनुवाइ विशेष समितिले विभिन्न मुलुकका लागि प्रस्तावित पाँच राजदूतको सुनुवाइ गरेको छ । 

समितिले परराष्ट्र सेवामा रहेका प्रस्तावित राजदूतमध्ये सेवा लम्साल अधिकारी, ताराप्रसाद पोखरेल, प्रकाशकुमार सुवेदी, डा दुर्गाबहादुर सुवेदी र ऋषिराम घिमिरेको संसदीय सुनुवाइ गरेको हो ।

उनीहरु पाँचै जना परराष्ट्र मन्त्रालयका सहसचिव हुन् । लम्साललाई पाकिस्तान, पोखरेललाई ब्राजिल, सुवेदीलाई संयुक्त राष्ट्र सङ्घको कार्यालय भियना, डा दुर्गालाई संयुक्त अधिराज्य र घिमिरेलाई रुसी महासङ्घका लागि नेपाली राजदूतमा सिफारिस गरेर सरकारले सुनुवाइ गर्न समितिमा पठाएको हो । 

संसदीय सुनुवाइका क्रममा प्रस्तावित राजदूतले आ–आफ्नो कार्ययोजना र सोच प्रस्तुत गर्दै आफू खटिएर जाने मुलुकसँगको सम्बन्धलाई थप विकास र विस्तार गर्नुका साथै आर्थिक कूटनीतिलाई जोड दिने प्रतिबद्धता जनाए ।

राजदूतमा सिफारिस भएका परराष्ट्र सेवाका तीन जनाको भोलि बिहान सुनुवाइ गर्ने समितिले कार्यसूची बनाएको छ । सहसचिवत्रय रमेशप्रसाद खनाललाई जर्मनी, झविन्द्रप्रसाद अर्याललाई इजिप्ट र लोकबहादुर थापालाई बेल्जियम र युरोपेली सङ्घका लागि राजदूतमा प्रस्ताव गरिएको छ । 

सरकारले परराष्ट्र सेवाभन्दा बाहिरबाट थप १४ जनालाई राजदूतका लागि प्रस्ताव गरेको छ ।

रासस 

 

प्रतिकृया दिनुहोस