चेपाङ वस्तीमा जलाइएका गोठ होइनन्, घर हुन्: वनमन्त्री बस्नेत
वन तथा वातावरण मन्त्री शक्तिबहादुर बस्नेतले चितवनको कुसुम खोलामा चेपाङ बस्तीका गोठमा नभएर घरमा आगजनी भएको बताएका छन्।
संघीय संसद प्रतिनिधि सभा अन्तर्गतको कृषि, सहकारी तथा प्राकृतिक स्रोत समितिको बुधबारको बैठकमा मन्त्री बस्नेतले मानविय त्रुटिका कारण चेपाङ वस्तीमा घरमा जलेको बताएका हुन्।
मन्त्रालयले घटनाको छानविन गर्न सहसचिवको नेतृत्वमा गठन गरेको समितिले प्रारम्भिक विवरण दिएको बताउँदै चेपाङ बस्तीमा गोठ नभइ त्यहाँ रहेका ८ घर भत्काउने र जलाउने काम भएको उनले बताए।
भूमि व्यवस्थापनको काम अगाडि बढिरहेको अवस्थामा निकुञ्जका कर्मचारिले हात्ति लगाएर घर भत्काउने तथा आगो लगाउने काम गर्नु अमानविय भएको समेत मन्त्री बस्नेतले बताए।
उनले घटना छानविन गर्न मन्त्रालयले गठन गरेको समितिको प्रतिवेदन आइनसकेको जानकारी समितिलाई गराए। मन्त्री बस्नेतले निकुञ्जका कर्मचारीले गरेको गल्ति ढाकछोप नगरिने प्रतिवद्धता जनाउँदै उक्त घटनालाई लिएर आफू गम्भिर रहेको बताए।
समितिले भने घटनालाई संवेदनशिल भइ छानविन गर्न मन्त्री बस्नेतलाई निर्देशन दिएको छ। बैठकका निर्णय सुनाउँदै समिति सभापति पूर्णकुमारी सुवेदीले यस्तो खालको घटना दोहोरिन नदिन र दोषिमाथि हदै सम्मको सजाय दिएर पीडित पक्षलाई उचित क्षतिपूर्तिको न्यायोचित व्यवस्था गर्न निर्देशन दिइन्।
समितिले समाजिक वञ्चितिकरणमा रहेका र निकुन्जलाई नै आफ्नो जिविको पार्जनको आधार बनाउँदै आएका निकुन्ज वरपर बस्ने बसोबासीहरूको व्यवस्थापन ६ महीनाभित्र गर्न समेत मन्त्रालयलाई निर्देशन दिएको छ।