थप समाचार विहीबार, पुस २४, २०७६

इरानसँग बिना सर्त वार्ता गर्न अमेरिका तयार

हिमालखबर

इरानसँग बिना सर्त वार्ता गर्न अमेरिका तयार

अमेरिकाले संयुक्त राष्ट्रसंघलाई पत्र लेखेर आफू इरानसँग बिनासर्त गम्भीर वार्ता गर्न तयार रहेको बताएको छ ।

अमेरिकाले इरानका सैन्य कमाण्डर कासिम सुलेमानीको इराकको राजधानी बग्दाद नजिकै ड्रोन आक्रमण गरेर हत्या गरेपछि दुई देश बीचको तनाव उत्कर्षमा पुग्ने आंकलन गरिएको थियो ।

बुधबार बिहान मात्रै इरानले सुनेमानीको दाहासंस्कार गरिसकेपछि इराकमा रहेका अमेरिकी सैन्य क्याम्पहरुमा मिसाइल आक्रमण गरेको थियो ।

त्यसपछि अमेरिकाले जवाफ फर्काउन सक्ने र युद्ध झनै लम्बीनसक्ने बारे विश्वभर चिन्ता व्यक्त भइरहेका बेला अमेरिकाले संयुक्त राष्ट्रसंघलाई पत्र लेखेर यस्तो प्रस्ताव अघि सारेको छ ।

इरानले पनि संयुक्त राष्ट्रसंघलाई पत्र लेखेको छ । तर इरानले आफू युद्धको पक्षमा नरहेको भनेर पत्रमा उल्लेख गरेको छ । 

के लेखेका छन् पत्रमा ?
इरानका दूत माजिद तख्तले अमेरिकी सेनामाथिको हमला र अमेरिकी दूत केली क्राफ्टले सुलेमानीको हत्या राष्ट्रसङ्घको बडापत्रको धारा १५ बमोजिम सहि भएको तर्क गरेका छन् ।

सो धारामा कुनैपनि राज्यले आफ्नो रक्षा गर्ने अधिकार प्रयोग गरी गरेको कुनै पनि कारबाही तुरुन्तै सुरक्षा परिषद्लाई जानकारी गराउनुपर्ने उल्लेख छ ।

अमेरिकाले उक्त संयुक्त राष्ट्रसंघलाई लेखेको पत्रमा आफ्नो रक्षाका लागि सुलेमानीको हत्या गर्नु परेको उल्लेख गरेको छ । इरानले पनि इराकमा रहेका अमेरिकी सैन्य क्याम्पमा गरेको सो आक्रमण आफूले आफ्नो रक्षार्थ गरेको भन्दै संयुक्त राष्ट्रसङ्घलाई स्पष्ट पारेको बीबीसीले उल्लेख गरेको छ ।

इरानका सर्वोच्च नेता आयतूला अली खामनेईले क्षेप्यास्त्र आक्रमणलाई अमेरिकाको गालामा लागेको चड्कनको रूपमा व्याख्या गर्दै मध्यपूर्व क्षेत्रबाट अमेरिका बाहिरिनुपर्ने बताएका थिए ।

उता अमेरिकाको संसद्‍को तल्लो सदनमा भने बिहीवार राष्ट्रपति डोनल्ड ट्रम्पलाई संसद्को अनुमति नलिई इरानविरुद्ध युद्ध स्वीकृत गर्ने अधिकार नियन्त्रण गर्ने सम्बन्धमा मतदान हुँदैछ ।

अमेरिका बीना सर्त वार्ता पनि गर्ने, युद्ध पनि लड्ने
अन्तर्राष्ट्रिय शान्ति र सुरक्षालाई थप खतरामा पर्नबाट जोगाउन र इरानका कारण बढ्न सक्ने तनावलाई रोक्ने उद्देश्य'ले सुलेमनीको हत्या गरेको उल्लेख गरिएको छ । अब हुनसक्ने थप क्षतिलाई मध्यनजर गरेरै आफू वार्ता गर्न तयार रहेको पनि अमेरिकाको भनाइ  छ । 

अमेरिकाले आफ्नो पत्रमा आफ्ना सेना र चासोको रक्षा गर्न आवश्यक परे अमेरिकाले थप कारबाही गर्ने लेखिएको छ भने इरानले आफ्नो पत्रमा तेहरानले युद्ध नचाहेको उल्लेख गरेको छ ।

प्रतिकृया दिनुहोस