भाइरल गीतले सम्झाइदिएको मरौटीको औषधीय गुण
‘रमरम मरौटी
तिम्रो रूपै करौँती...’
भिडियो बनाएर टिकटकमा ‘शेयर’ गरिरहेका नयाँ पुस्तामाझ पक्कै मरौटीबारे थाहा पाउने हुटहुटी जागेको हुनुपर्छ। हामीमध्ये पनि कतिपयलाई मरौटी के हो भन्ने थाहा नहुन सक्छ ।
गायक खेम सेञ्चुरी र गायिका अस्मिता अधिकारीद्वारा स्वरबद्ध गीतले मरौटी शब्दलाई जुन ओजका साथ उछालेको छ, उति नै त्यो गुणकारी पनि छ। युट्युबमा सार्वजनिक भएको तीन सातामै ५० लाख भ्यूज कमाउन सफल गीतमा प्रयोग गरिएको मरौटी खासमा के हो त?
स्वास्थ्य रक्षाका लागि क्रियाशील आयुर्वेद समाजका अध्यक्ष रमाकान्त सापकोटाका अनुसार, मरौटीको पञ्चाङ्ग (जरा, डाँठ, पात, फल र फूल) नै आयुर्वेदिक आषैधिमा प्रयोग हुन्छ। मरौटीलाई जनबोलीमा मरहट्टी र भुइँ टिमुर समेत भनेर चिनिने गरेको उनले सुनाए। “मरौटी हल्का पिरो, टर्रो र रमरम स्वादको हुन्छ,” सापकोटाले भने, “महाराष्ट्रिय सोरस लगायत आयुर्वेदिक औषधिमा यसको प्रयोग हुन्छ।”
खोकी, शरीर, दाँत दुखाइ, मुखमा घाउ, खटिरा आउने जस्ता समस्यामा मरौटीको प्रयोग लाभदायी हुने उनको भनाइ छ। श्वासप्रश्वास र पाचन प्रणालीलाई पनि मरौटीबाट बनेको आयुर्वेदजन्य औषधिले फाइदा गर्ने सापकोटाले बताए। घरगाउँमा पेट, दाँत दुख्दा, अपच हुँदा र रुघाखोकी लाग्दा मरौटी खाने चलन छ। सामुदायिक वन उपभोक्ता महासङ्घ बाग्लुङका अध्यक्ष राज थापाले मरौटी बहुउपयोगी वनस्पति भएको बताए। “औषधि र मसलाजन्य दुवै गुण मरौटीमा पाइन्छ,” उनले भने, “खाना स्वादिष्ट बनाउन भान्सामा पनि यसको प्रयोग हुन्छ।”
अचार र चटनीमा राख्दा मरौटीले स्वाद थप्छ। आयुर्वेदको तयारी औषधि बाहेक घरायसी विधिबाट पनि मरौटीको प्रयोग गर्न सकिन्छ। झोल बनाएर खान सकिने र शरीर दुखाइमा पात/जरा दलेर पनि घरेलु उपचार गर्न सकिने आयुर्वेद चिकित्सक बताउँछन्। व्यावसायिक खेती नभएकाले ग्रामीण भेगमा फाट्टफुट्ट मात्र मरौटीको वनस्पति भेटिने गरेको थापाको भनाइ छ। उनले जङ्गलमा पाइने मरौटीलाई ‘वन मरौटी’ भन्ने गरिएको बताए। त्यो घरमा हुनेभन्दा केही मसिनो हुन्छ। आयुर्वेदीय गुण भने त्यसमा पनि उत्तिकै हुन्छ।
मरौटी
मरौटी धेरै फलेमा टिपेर सुकाएर भण्डारण पनि गर्न सकिन्छ। झट्ट हेर्दा फूल झैं देखिने मरौटीको फल सुकेर झरेपछि त्यसैबाट नयाँ बिरुवा पलाउँछ । मरौटीको व्यावसायिक खेती गर्न सके किसानको आयआर्जन बढ्ने धनवन्तरी स्वास्थ्य सहकारी संस्थाका अध्यक्ष सापकोटाले बताए।
खोजी र संरक्षण नभए मरौटी लोप भएर जाने खतरा रहेको उनको भनाइ छ। गुणकारी वनस्पति सम्झाइदिने गीत ‘रमरम मरौटी’ मा कलकार पूजा शर्मा र ओवी रायमाझीको अभिनय छ। तीन साताअघि ‘ओवी रायमाझी’ युट्युब च्यानलबाट गीतको भिडिओ सार्वजनिक भएको थियो।
_1679908112.jpg)
