समाचार आइतबार, मंसिर १, २०७६

कालापानी अतिक्रमणको दुई सातापछि बोले प्रधानमन्त्री–‘यो सरकार पहिलेको जस्तो होइन’

हिमालखबर

लिम्पियाधुरा–कालापानी–लिपुलेक अतिक्रमण गरी भारतले राजनीतिक नक्सा सार्वजनिक गरेको दुई साता पछि प्रधानमन्त्री केपी शर्मा ओलीले अतिक्रमित क्षेत्रबाट सेना फिर्ता लैजान आग्रह गरेका छन् ।

जनस्तरबाट चर्को विरोध भइरहदा समेत प्रधानमन्त्री ओलीले कुनै सार्वजनिक अभिव्यक्ति दिएका थिएनन् । तर, आइतबार युवा संघको बैठकमा प्रधानमन्त्री ओलीले एक इन्च पनि नेपाली भूमि मिच्न नदिने बताए । प्रधानमन्त्री ओलीले अतिक्रमित क्षेत्रबाट सेना फिर्ता लैजान समेत आग्रह गरेका छन् ।

“छिमेकी देशले हाम्रो भूमिबाट आफ्ना सैना फिर्ता लैजाओस्” प्रधानमन्त्रीको भनाइ थियो, “सरकार एक इन्च पनि जमिन मिच्न दिदैन ।” कूटनीतिक सम्वादमा समस्या हल गर्ने भन्दैमा उत्शृङ्खल गतिविधि गर्न नपाउने प्रधानमन्त्री ओलीले बताए ।

प्रधानमन्त्री ओलीले संसदीय समितिको निर्देशनजस्तो नयाँ नक्सा जारी नहुने बताए । “नयाँ होइन, मिचिएको भूमि फिर्ता हुनुपर्छ”, प्रधानमन्त्रीले भने । यो सरकार पहिलेको जस्तो नभएको प्रधानमन्त्रीको भनाइ थियो ।

तर, कुटनीतिक सम्वादमार्फत सीमा विवाद हल गर्न सरकार तयार रहेको समेत प्रधानमन्त्री ओलीले बताए । १ नोभेम्बरमा भारतले नेपाली भूमि समेत समेटेर राजनीतिक नक्सा जारी गरेको थियो । त्यस यता जनस्तरबाट भारतीय कदमको चर्को विरोध भइरहेको छ ।

परराष्ट्र मन्त्रालयले भारतीय नक्सा अस्वीकार्य भएको बक्तव्य जारी गरे पनि प्रधानमन्त्री ओलीले सार्वजनिक अभिव्यक्ति दिएका थिएनन् ।

२३ कात्तिकमा सर्वदलीय बैठक बोलाएर साझा धारणा बनाए पनि २५ कात्तिकमा राज्य व्यवस्था तथा सुशासन समितिको बैठकमा अनुपस्थित भए पछि प्रधानमन्त्रीको समेत आलोचना हुन थालेको छ ।

 

 

 

प्रतिकृया दिनुहोस