कैदी मृत्यु प्रकरण: परिवारले शव बुझ्न मानेनन्
![कैदी मृत्यु प्रकरण: परिवारले शव बुझ्न मानेनन्](https://www.himalkhabar.com/uploads/posts/800X600/jail_sankhuwasabha_1691572177.jpg)
कारागारका अन्य कैदीबन्दी र स्थानीय प्रत्यक्षदर्शीका अनुसार प्रहरीले दुवै जनालाई कुटपिट गरेको थियो। प्रहरीको कुटाइबाट मृत्यु भएको आरोप लगाउँदै आफन्तले शव बुझ्न नमानेका हुन्।
संखुवासभा जिल्ला कारागार खाँदबारीमा बुधबार दुई कैदीको मृत्यु भएको घटनामा मृतकका परिवारले शव बुझ्न मानेका छैनन्। प्रहरीको कुटाइबाट कैदीबन्दीको मृत्यु भएको आरोप लगाउँदै आफन्तले शव बुझ्न नमानेका हुन्।
कारागारमा रहेका मादी नगरपालिका-५ का १९ वर्षीय विनोद तोलाङ्गी र नुवाकोटको ककनी गाउँपालिका-७ का २८ वर्षीय आकाश बलामीको बुधबार बिहान मृत्यु भएको थियो। जिल्ला प्रहरी कार्यालय, संखुवासभाका प्रहरी नायब उपरीक्षक वीरेन्द्र गोदारले कैदीबन्दी तोलाङ्गी र बलामीको उपचारका क्रममा जिल्ला अस्पतालमा मृत्यु भएको बताए।
कारागारबाट भाग्न राति १ बजे शौचालयको झ्यालको रड काटेर निस्किने क्रममा उनीहरूलाई प्रहरीले नियन्त्रणमा लिएर कारागार प्रशासनको जिम्मा लगाएको उनको भनाइ छ। कारागारका अन्य कैदीबन्दी र स्थानीय प्रत्यक्षदर्शीले भने प्रहरीले दुवै जनालाई कुटपिट गरेको बताएका छन्।
प्रहरी विरुद्ध कारागारभित्रका कैदीबन्दीले नाराबाजी र प्रदर्शन समेत गरेका छन्। दोषी प्रहरीमाथि कारबाही हुनुपर्ने कैदीबन्दीको माग छ। कैदीको मृत्युपछि कारागारको अन्तरिक सुरक्षालाई ध्यानमा राख्दै नाइके सहितका नौ बन्दीलाई जिल्ला प्रहरीमा लगिएको कारागारका जेलर राजेन्द्र घिमिरेले बताए।
जिल्ला अदालतले जबर्जस्ती करणी मुद्दामा तोलाङ्गीलाई १८ वर्ष तथा चोरी मुद्दामा बलामीलाई तीन वर्ष कैद सजायको फैसला गरेको थियो। दुवै जना एक वर्षदेखि कारागारमा थिए।
छानबिन समिति गठन
यसैबीच घटनाको छानबिनका लागि तीन सदस्यीय छानबिन समिति पनि गठन गरिएको छ। संखुवासभाका प्रमुख जिल्ला अधिकारी शिवकुमार कार्कीका अनुसार सहायक प्रमुख जिल्ला अधिकारी मोहनमणि घिमिरेको नेतृत्वमा प्रहरी निरीक्षक सरोज खनाल र जिल्ला प्रशासन कार्यालयका नायब सुब्बा तारिणी घिमिरे सदस्य रहेको समिति गठन गरिएको छ।
जिल्ला कारागारमा हाल आठ महिला सहित १३८ कैदीबन्दी छन्।