मतदानको दिन कुन कुन सवारी साधन चलाउन पाइन्छ?
निर्वाचन आयोगले प्रतिनिधि सभा सदस्य तथा प्रदेश सभा सदस्य निर्वाचनको मतदानको दिनको सवारी आवागमन व्यवस्थापन सम्बन्धी मापदण्ड अनुसार तोकिएका सवारी साधन सञ्चालन गर्न पाइने जनाएको छ।
उम्मेदवार वा उम्मेदवारको निर्वाचन प्रतिनिधिले मतदानको दिन सवारी साधन प्रयोग गर्न तोकिएको ढाँचामा सम्बन्धित मुख्य निर्वाचन अधिकृत वा निर्वाचन अधिकृत समक्ष निवेदन दिनुपर्नेछ। उम्मेदवार बाहेक अन्य निकाय वा संस्थाले मतदानको दिन सवारी साधन प्रयोग गर्न सम्बन्धित निकाय वा संस्थाको आधिकारिक लेटर प्याडमा सवारी साधन नम्बर, सवारी साधनको किसिम र सवारी साधन प्रयोगकर्ताको नाम समेत उल्लेख गरी अनुमति जारी गर्ने निकाय वा अधिकारी समक्ष निवेदन दिनुपर्नेछ।
स्वीकृत मापदण्ड बमोजिम मतदानको दिन अन्तर्राष्ट्रिय तथा आन्तरिक हवाई उडानको माध्यमबाट यात्रा गर्ने यात्रुहरूको हकमा पासपोर्ट, भिसा र हवाई टिकटका आधारमा वासस्थानदेखि विमानस्थलसम्म र विमानस्थलदेखि यात्रुको वासस्थानसम्म आवागमनका लागि सम्बन्धित जिल्लाका प्रमुख जिल्ला अधिकारीले सहजीकरण गर्नुपर्नेछ भने अपाङ्गता भई आफैं हिंडडुल गर्न नसक्ने व्यक्तिका लागि वासस्थानदेखि मतदान केन्द्रसम्म र मतदान केन्द्रदेखि वासस्थानसम्म आवतजावत गर्न अवधि कायम रहेको पूर्ण अशक्त वा अति अशक्त अपाङ्गता परिचयपत्रका आधारमा सवारी साधनको प्रयोग गर्न सकिनेछ।
अशक्तताका कारण आफैं हिंडडुल गर्न नसक्ने व्यक्तिको हकमा सम्बन्धित वडा कार्यालयको सिफारिशमा निर्वाचन अधिकृतले तोकिएको ढाँचामा अनुमतिपत्र जारी गर्न सक्नेछ।
छुट्टै अनुमतिपत्र नचाहिने सवारी साधन
निर्वाचन आयोगका अनुसार, निम्न सवारी साधनलाई छुट्टै परिचयपत्र चाहिंदैन। तर, त्यस्ता सवारी साधन मतदाता ओसारपसार गर्ने कामका लागि प्रयोग गर्न पाइनेछैन।
- मतदानको दिन बिरामी बोकेको एम्बुलेन्स
- खानेपानीको ट्यांकर
- दूध बोक्ने सवारी साधन
- दमकल
- सूचना तथा प्रसारण विभाग वा प्रदेश सञ्चार रजिष्ट्रारको कार्यालय वा प्रदेश सरकार मातहतको सञ्चार प्राधिकरण वा अन्य त्यस्तै प्रकृतिको नियामक निकायबाट जारी गरिएको प्रेस पास वा प्रचलित कानून बमोजिम दर्ता र प्रेस काउन्सिल नेपालमा सूचीकृत भई सञ्चालनमा रहेका सम्बन्धित सञ्चारगृहबाट जारी परिचयपत्र वाहक सञ्चारकर्मीले प्रयोग गर्ने सवारी साधन
- दूरसञ्चार तथा केबुल सेवाका लागि प्रयोग हुने सवारी साधन
- शव वाहन
- अस्पतालमा कार्यरत परिचयपत्र प्राप्त चिकित्सक
- स्वास्थ्यकर्मी तथा कर्मचारीको आवागमनका लागि प्रयोग हुने सवारी साधन
- निर्वाचन आयोगबाट जारी परिचयपत्रवाहक पर्यवेक्षक, अवलोकनकर्ता, अनुगमनकर्ताले प्रयोग गर्ने सवारी साधन
- फोहोरमैला ओसारपसार गर्ने सवारी साधन, तरकारी, फलफूल तथा विद्युत् सेवाका लागि प्रयोग हुने सवारी साधन
- कूटनीतिक नियोग, यूएन एजेन्सी र द्विपक्षीय तथा बहुपक्षीय विकास साझेदार संस्थाहरूमा कार्यरत पदाधिकारी एवं कर्मचारीले प्रयोग गर्ने निलो नम्बर प्लेट भएको सवारी साधन
- विदेशी पर्यटक मात्र बोकेको हरियो नम्बर प्लेट भएको सवारी साधन
- सुरक्षाकर्मीले प्रयोग गर्ने सुरक्षा निकायको सवारी साधन
- आफू खटिएको मतदान केन्द्रसम्म जान र मतदान केन्द्रबाट फर्किन मतदान कार्यमा खटिने कर्मचारी तथा स्वयंसेवकले प्रयोग गर्ने सवारी साधन।
मापदण्ड विपरीत सवारी साधन प्रयोग गरेको पाइएमा सुरक्षा निकाय तथा सुरक्षाकर्मीले त्यस्तो सवारी साधन कब्जामा लिई आवश्यक कानूनी कारबाही गर्ने र मतदानको काम सम्पन्न भएपछि मात्र फिर्ता दिने व्यवस्था गरिएको निर्वाचन आयुक्त रामप्रसाद भण्डारीले जानकारी दिए।