रिपोर्ट आइतबार, चैत ९, २०७६

महामारी विरुद्ध सुरक्षाकर्मीको तयारी

दीपक खरेल

महामारी विरुद्ध सुरक्षाकर्मीको तयारी
सैनिक मुुख्यालय परिसरमा कोभिड–१९ रोकथामको पूर्वाभ्यासका लागि बनाइएका टेन्ट।

नेपाल सेनाको स्वयम्भूस्थित बारुदखानाबाट अहिले स्यानिटाइजर उत्पादन भइरहेको छ । लघु उद्योगहरूमा भने मास्क बनिरहेको छ । स्वास्थ्यकर्मीले शरीर ढाक्न लगाउने पोशाक ‘पर्सनल प्रोटेक्टिभ इक्विपमेन्ट’ पनि बनाउन सेनाले अध्ययन गरिरहेको छ ।

सेनासहित देशका तीनवटै सुरक्षा निकाय सशस्त्र प्रहरी र नेपाल प्रहरी कोभिड–१९ संक्रमण रोकथाम र नियन्त्रणको तयारीमा छन् । ती निकायले अत्यावश्यक बाहेकका गतिविधि रोकेर कोरोना भाइरस विरुद्ध जुध्ने तयारी गरेका हुन् ।

सुरक्षा निकायले तयार पारेका संरचनामा एकै पटक ३२०० देखि ३५०० सम्मलाई ‘क्वारेन्टाइन’ मा राख्न सकिन्छ । यस्तै करीब २०० जनालाई ‘आइसोलेसन’ र १०० जनालाई सघन उपचार कक्षमा राख्न सकिन्छ ।

सेनाले काठमाडौं र बाहिर गरी चारवटा अस्पतालमा सघन उपचार कक्ष तयार गरेको छ । काठमाडौंको वीरेन्द्र सैनिक अस्पतालमा १० सघन उपचार कक्ष तयारी अवस्थामा छन् । त्यस्तै पोखरा, इटहरी र धनगढीका सैनिक अस्पतालका १५० शय्यामध्ये २५ प्रतिशतलाई आइसोलेसन र सघन उपचार कक्ष बनाइने सैनिक प्रवक्ता सहायक रथी विज्ञानदेव पाण्डे बताउँछन् ।

काठमाडौं उपत्यकामा बनाएको २०० क्वारेन्टाइन वार्डमा ४०० र बाहिर रहेका सात पृतना र २२ बाहिनी मार्फत बनाएका १५०० क्वारेन्टाइन वार्डमा ३ हजार जनालाई राख्न सकिन्छ ।

आफ्ना २ हजार ३५८ स्वास्थ्य जनशक्तिलाई चारवटै अस्पताल र आपत्कालीन उद्धारमा खटाउने सेनाको तयारी छ । यस बाहेक सेना बाहिरका करीब २०० स्वास्थ्यकर्मीलाई पनि उपयोग गरिने प्रवक्ता पाण्डे बताउँछन् । ती स्वास्थ्यकर्मीको सहयोगीका रूपमा खटाउन २०० सैनिकलाई स्वास्थ्य सम्बन्धी तालिम दिइनेछ । बिरामी बोक्न उपत्यकासहित देशभर रहेका सेनाका १६ फिल्ड एम्बुलेन्स प्रयोग हुनेछन् ।

सेनाले सैनिक स्वास्थ्य महानिर्देशक सुनिलकुमार सिंहको कमाण्डमा कोरोना संक्रमण रोकथाम र उपचारको आन्तरिक तयारी र उपरथी प्रभुराम शर्माको कमाण्डमा अन्य सरकारी संयन्त्रसँग समन्वय गरिरहेको छ । यसको सुपरीवेक्षण प्रधानसेनापति पूर्णचन्द्र थापा आफैंले गरिरहेका छन् । कोरोना भाइरस संक्रमण विरुद्ध सैनिकहरूलाई खटाउन कार्यविधि नै बनाइएको छ । विदेशबाट फर्किएका सैनिकले १४ दिन घरमै अनिवार्य क्वारेन्टाइनमा बस्नुपर्नेछ ।

सशस्त्र प्रहरीले पनि काठमाडौंको बलम्बुस्थित नेपाल एपीएफ अस्पतालमा २० शय्याको सघन उपचार कक्ष स्थापनाका लागि आवश्यक उपकरण खरीद गरिसकेको छ । अन्तर्राष्ट्रिय मापदण्ड अनुसारको सघन कक्ष जतिसक्दो चाँडो तयार गर्न महानिरीक्षक शैलेन्द्र खनालको सचिवालय सक्रिय छ ।

सशस्त्रले उपत्यकासहित सातै प्रदेशमा १२०० देखि १५०० शय्या क्षमताका क्वारेन्टाइन स्थापनाको तयारी गरिरहेको छ । भारत र चीनसँगका १३९ सीमा नाकामा स्वास्थ्य ‘हेल्प डेस्क’ स्थापना भएका छन् । तीमध्ये १२९ स्थानमा ज्वरो नाप्ने यन्त्र राखिएको छ भने अन्य १० ठाउँमा पनि लगिंदैछ ।

शङ्का लागेका विदेशीलाई सीमाबाटै फिर्ता पठाउने र नेपालीलाई उपचारका लागि नजिकको स्वास्थ्य संस्थामा लैजाने गरिएको सशस्त्र प्रहरी प्रवक्ता डीआईजी प्रवीणकुमार श्रेष्ठ बताउँछन् ।

नेपाल एपीएफ अस्पतालका मेडिकल डाइरेक्टर सशस्त्र प्रहरी वरिष्ठ उपरीक्षक (एसएसपी) रूपक महर्जनको नेतृत्वमा कोरोना भाइरस रोकथाम र उपचारका लागि ‘कोर ग्रुप’ बनाइएको छ । सरकारका निर्णयहरू लागू गर्न\गराउन तथा अन्य निकायसँग समन्वय तथा सहकार्यका लागि अतिरिक्त महानिरीक्षक (एआईजी) नारायणबाबु थापाको संयोजकत्वमा ‘क्राइसिस रेस्पोन्स’ मूल समिति गठन गरिएको छ ।

उता नेपाल प्रहरीले प्रधान कार्यालयदेखि देशभरका चौकीमा कार्यरत करीब १२ हजारलाई आवश्यक तालिम दिएर कोरोना संक्रमण रोकथामका लागि तयारी अवस्थामा राखेको छ । नेपाल प्रहरीले सर्वसाधारणलाई सचेत गर्ने, आवश्यक निगरानी र अनुगमन गर्ने तथा पहिलो उद्धारकर्ताका रूपमा काम गर्नेछ ।

प्रहरी प्रवक्ता डीआईजी शैलेश थापा क्षेत्रीका अनुसार प्रहरी अस्पताल, महाराजगञ्ज र २ नं. गण महाराजगञ्ज नजिक चारवटा उपचार कक्षसहित ५० शय्या क्षमताको आइसोलेसन कक्ष बनिरहेको छ ।

प्रहरीले पोखरा, सुर्खेत र सिरहाका आफ्ना अस्पताललाई पनि तयारी अवस्थामा राखेको छ । प्रवक्ता क्षेत्री भन्छन्, “हामीसँग स्वास्थ्य सेवामा ८०० जनशक्ति कार्यरत छन् । आवश्यकता अनुसार धेरैभन्दा धेरैलाई फिल्डमा खटाउँछौं ।”

 

प्रतिकृया दिनुहोस