थप समाचार सोमबार, फागुन १२, २०७६

टेम्केमैयुङमा मुन्दुम पर्यटकीय सांस्कृतिक महोत्सव हुने

हिमालखबर

टेम्केमैयुङमा मुन्दुम पर्यटकीय सांस्कृतिक महोत्सव हुने

भ्रमण वर्ष २०२० लाई सफल बनाउन मुन्दुम पदमार्गको पर्यटन प्रबद्र्धन गर्न टेम्केमैयुङ पर्यटकीय साँस्कृतिक महोत्सव २०७६ आयोजना हुने भएको छ ।

सय नयाँ पर्यटकीय गन्तव्यमा सुचिकृत रहेको भोजपुरको टेम्के पदमार्ग (मुन्दुम पदमार्ग) लाई पर्यटकीय क्षेत्र बनाउने लक्ष्यका साथ टेम्केमैयुङ गाउँपालिकाको आयोजनामा दुई दिने महोत्सवको हुन लागेको हो ।

यही १३ र १४ फागुनमा टेम्केमैयुङ गाउँपालिकाको केन्द्र अन्नपूर्ण क्याम्प डाँडामा आयोजना हुने महोत्सवमा प्रदेश नं. १ का मुख्यमन्त्री शेरधन राईको प्रमुख आतिथ्यतामा हुनेछ । यो सांस्कृतिक महोत्सवले भ्रमण वर्ष सफल पार्न सहयोग पुग्ने गाउँपालिकाले जनाएको छ ।

मुन्दुम पदमार्गको पर्यटन प्रबद्र्धन गर्दै स्थानीय कला, संस्कृति, साहित्य क्षेत्रलाई टेवा पुर्‍याउने मुख्य उद्देश्यले महोत्सव आयोजना गर्न लागिएको टेम्केमैयुङ गाउँपालिकाका अध्यक्ष ध्रुवराजले जानकारी दिए । महोत्सवबाट आन्तरिक तथा बाह्य पर्यटनको आकर्षण बढ्ने अपेक्षा रहेको उनले बताए ।

महोत्सवमा बरिष्ठ संगितकार गणेश रसिकको एकल साँझ, साँगीतिक तथा स्थानीय साँस्कृतिक कलाकृतिको प्रस्तुति, स्थानीय उत्पादनको प्रदर्शन, साहित्यीक भलाकुसारी तथा सांगितिक प्रस्तुति लगायतका कार्यक्रम रहने महोत्सवको आयोजक टेम्केमैयुङ गाउँपालिकाले जनाएको छ ।

यस्तै महोत्सवमा जिल्लाभित्रका साहित्यिक, सांगातिक, चलचित्र, खेलकुद क्षेत्रका विभिन्न श्रष्टाहरुलाई सम्मान गरिने कार्यक्रम पनि रहेको आयोजक गाउँपालिकाले जनाएको छ । महोत्सवका लागि गाउँपालिकाले ८ लाख बजेट विनियोजन गरेको छ ।

प्रतिकृया दिनुहोस