खेलकुद शनिबार, मंसिर २१, २०७६

बांग्लादेशले नेपाललाई दियो १५६ रनको चुनौती

हिमालखबर

बांग्लादेशले नेपाललाई दियो १५६ रनको चुनौती
null

तेह्रौ दक्षिण एसियाली खेलकुद (साग) क्रिकेटमा बांग्लादेशले नेपाललाई १५६ रनको चुनौती दिएको छ ।

टस जितेर नेपालले फिल्डिङ रोजेपछि बांग्लादेशले ब्याटिङ गरेको थियो । बांग्लादेशले ६ विकेटको क्षतिमा १५५ रन बनाएको छ ।

पूर्व कप्तान पारस खड्काको उत्कृष्ट बलिङमा नेपालले राम्रो शुरुवात गरेपनि अन्तिमतिर बांग्लादेशले उत्कृष्ट स्कोर जोड्यो । खड्काले चार ओभरमा १५ रन खर्चदै तीन विकेट लिएका थिए ।

उपकप्तान दीपेन्द्रसिंह ऐरीले अन्तिम ओभरमा दुई विकेट लिए भने अविनाश बोहोराले एक विकेट लिएका थिए । अन्य बलरले भने विकेट लिन सकेनन् ।

बांग्लादेश विरुद्धको यो खेल नेपालले जित्नैपर्ने दबाव छ । स्वर्ण पदकको संभावना कायमै राख्न फराकिलो अन्तरले बांग्लादेशलाई नेपालले पराजित गर्नुपर्नेछ ।

तीन खेल खेलेको नेपालसँग बांग्लादेशले एक खेल कम खेल्दै चार अंक बटुलेको छ । अझ रनरेट पनि बांग्लादेशकै राम्रो छ ।

यदि, नेपालले बांग्लादेशलाई फराकिलो अन्तरले पराजित गर्न सके र बांग्लोदश आइतबारको खेलमा श्रीलंकासँग पराजित भए नेपालले स्वर्ण पदकका लागि खेल्ने अवसर पाउनेछ ।

तीन खेलबाट अपराजित ६ अंक जोडेको श्रीलंका अंक तालिकाको शीर्ष स्थानमा छ । तर, नेपालले माल्दिभ्स र भुटानलाई पराजित गरे पनि भने श्रीलंकासँग पराजित हुँदा चार अंक सहित तेस्रो स्थानमा छ ।

प्रतिकृया दिनुहोस