सन्दीप लामिछाने विरुद्ध पक्राउ पुर्जी जारी
राष्ट्रिय क्रिकेट टोलीका कप्तान सन्दीप लामिछाने विरुद्ध पक्राउ पुर्जी जारी भएको छ।
नाबालिगलाई बलात्कार गरेको आरोपमा लामिछाने विरुद्ध प्रहरी वृत्त गौशालामा जाहेरी परेको थियो। उनी विरुद्ध थप अनुसन्धान गर्न पक्राउ पुर्जी जारी गरिएको जिल्ला प्रहरी परिसर, काठमाडौंले जनाएको छ।
प्रहरी परिसर काठमाडौंले प्रेस विज्ञप्ति जारी गरी भनेको छ, “मुलुकी अपराध (संहिता) ऐन, २०७४ को परिच्छेद १८ को दफा २१९ को ‘जबर्जस्ती करणी गर्न नहुने’ कसूरमा निज सन्दीप लामिछाने उपर थप अनुसन्धान गर्नका लागि काठमाडौं जिल्ला अदालतबाट पक्राउ पुर्जी जारी भएको।”
महानगरीय प्रहरी वृत्त गौशालामा परेको जाहेरीमा लामिछानेले नाबालिकालाई यही भदौ ५ गते काठमाडौं र भक्तपुरका विभिन्न स्थानमा घुमाएको र सोही दिनको राति काठमाडौंको एक होटलमा ल्याएर जबर्जस्ती करणी गरेको आरोप छ।
अहिले लामिछाने क्यारेबियन प्रिमियर लिग (सीपीएल) क्रिकेट खेल्नका लागि सेन्ट लुसियामा छन्। त्यसअघि उनी भदौ ६ गते राष्ट्रिय टोलीसँगै केन्या गएका थिए। केन्यासँग टी-२० शृङ्खला खेलेपछि उनी सीपीएल खेल्न सेन्ट लुसिया गएका थिए।