अर्थ/बजार बुधबार, चैत १२, २०७६

नेपाल टेलिकमको रिचार्जमा शतप्रतिशत बोनस

हिमालखबर

नेपाल टेलिकमको रिचार्जमा शतप्रतिशत बोनस

नेपाल टेलिकमले बन्दाबन्दी (लकडाउन)को समय ११ चैत्रदेखि १८ चैत्रसम्म रिचार्ज गर्दा शतप्रतिशत बोनस दिने भएको छ ।

लकडाउन अवधिभर टेलिकमले मोबाइल सेवाको प्रयोगलाई थप सहज सेवा प्रदान गर्न यस्तो निर्णय गरिएको जानकारी दिएको छ ।

टेलिकमका अनुसार यो निर्णय १३ चैत्र २०७६ देखि ७ दिनको लागि लागू हुनेछ । वोनसको व्यवस्था अनुसार नेपाल टेलिकमको जीएसएम तथा सीडीएमएको प्रिपेड तथा पोस्टपेड सेवामा रिचार्ज कार्ड वा एमपोसबाट रिचार्ज गर्दा रिचार्ज गरेको रकमको शतप्रतिशत बराबर बोनस प्राप्त हुनेछ ।

यसरी प्राप्त गरेको वोनस रकमबाट प्याकेज बाहेकको दररेट अन्तर्गत नेपाल टेलिकमको नम्बरमा कल गर्न, एसएमएस पठाउन तथा डाटा प्रयोग गर्न सकिने छ ।

उक्त बोनस रकमबाट ब्यालेन्स ट्रान्सफर गर्न वा प्याकेज खरिद गर्न वा गिफ्ट पठाउन सकिने छैन । रिचार्ज कार्ड प्रयोग गरी रु.५० र रु.१०० को रिचार्ज गर्दा प्राप्त हुने वोनस रकम दुई दिनभित्र खपत गरिसक्नु पर्छ ।

रु.२०० र रु.५०० को रिचार्जमा प्राप्त हुने वोनस रकम ४ दिनभित्र खपत गरिसक्नुपर्ने छ । रु.१००० को रिचार्जमा प्राप्त हुने वोनस रकम ६ दिनभित्र खपत गरिसक्नु पर्ने टेलिकमले जानकारी दिएको छ ।

एमपोस वा विद्युतीय रिचार्ज अन्तर्गत रु.१० देखि रु.९९ सम्मको रिचार्जमा प्राप्त हुने वोनस २ दिनभित्र खपत गरिसक्नु पर्नेछ । रु.१०० देखि रु.४९९ सम्मको रिचार्जमा प्राप्त हुने वोनस ४ दिन भित्र खपत गरिसक्नु पर्नेछ ।

रु. ५०० देखि रु. ९९९ सम्मको रिचार्जमा प्राप्त हुने वोनस ८ दिनभित्र खपत गर्नुपर्ने हुन्छ ।  रु. १००० वा सो भन्दा माथिको रिचार्जमा प्राप्त हुने वोनस १० दिनभित्र खपत गरिसक्नु पर्ने टेलिकमका प्रवक्ता राजेश जोशीद्वारा जारी एक प्रेस विज्ञप्तीमा उल्लेख छ ।

प्रतिकृया दिनुहोस