समाचार बुधबार, फागुन १४, २०७६

वामदेवबारे निर्णय गर्नु पहिले नै खतिवडालाई राष्ट्रियसभामा सिफारिस गरिसकेको ओलीको दाबी

हिमालखबर

वामदेवबारे निर्णय गर्नु पहिले नै खतिवडालाई राष्ट्रियसभामा सिफारिस गरिसकेको ओलीको दाबी

प्रधानमन्त्री केपी शर्मा ओली र वरिष्ठ नेता माधव कुमार नेपालबीच बालुवाटारमा भएको भेटघाट सकिएको छ । बालुवाटार स्रोतका अनुसार भेटमा प्रधानमन्त्री ओलीले नेता नेपाललाई पार्टीको निर्णय आउनु अघि नै मन्त्रिपरिषदले अर्थमन्त्री खतिवडाको राष्ट्रियसभामा म्याद थपका लागि सिफारिस गरिसकेको बताएका छन् ।

सत्तारुढ नेपाल कम्युनिष्ट पार्टी नेकपाको सचिवालय बैठकले बुधबार बिहान वामदेव गौतमलाई राष्ट्रियसभामा लैजाने भनेर निर्णय गरेको थियो । तर त्यसपछि प्रधानमन्त्री ओलीले नेता नेपालसँग आफूमाथि घेराबन्दी भएको भन्दै गौतमलाई सिफारिस गर्न आफू बाध्य नहुने बताएका थिए ।

ओलीले बैठकमा सहमति भइसकेको विषयमा निर्णय नलिने बताएपछि नेता नेपाल बालुवाटार पुगेका थिए ।

 प्रधानमन्त्रीका प्रेस सल्लाहकार सूर्य थापाले यसअघि हिमालसँग सचिवालयको निर्णयमा कुनै फेरबदल नभएको बताएका थिए । सचिवालय बैठकको निर्णय बाहेक अरू कुनै निर्णय नभएको उनले जानकारी दिएका थिए ।

 

प्रतिकृया दिनुहोस