समाचारबिहिबार, ३० आश्विन , २०७६

आलम प्रकरणः ‘घाइतेलाई जिउँदै जलाउन र प्रमाण नष्ट गर्न दुई एसपीकै संलग्नता’

मुकेश पोखरेल

चुनावको मौन अवधि सुरु भइसकेकाले तत्कालीन माओवादीका सक्रिय कार्यकर्ता किरण साह घरमै बसिरहेका थिए । २७ चैत २०६४  साँझ करीब ६ः१५ तिर घरै भत्काउँला जस्तो गरी आवाज आयो ।

२८ असोजमा म्याद थपका लागि जिल्ला अदालत रौतहट लगिएका आलम (बायाँ) र बम बिस्फोटमा ज्यान गुमाएका ओसी अख्तरको नागरिकताको प्रमाणपत्र ।

बिस्तारै धुँवाको मुस्लो फैलियो । साहको घरबाट तीन सय मिटर पनि टाढा नरहेको पूर्व मन्त्री शेख इद्रिसको घरबाट धुँवा फैलिइरहेकाे थियो । त्यस बेलाका घटना सम्झदै साह भन्छन्, “छिमेकका हामी आगलागी भएछ भनेर बाल्टीमा पानी बोकेर गयौं । तर, त्यहाँ पुग्दा अर्कै दृष्य देखियो ।”

साहसँगै, रामबहादुर साह, धरिक्षण साह र प्यूसाह कानु पनि इद्रिसको घर पुगेका थिए । “त्यहाँ पुग्दा त आगलागी नभएर बम बिस्फोट भएको रहेँछ । कसैका शरीरबाट अंग छुटेका थिए भने धेरै रगताम्मे थिए”, साह भन्छन् ।

पानी बोकेर घटनास्थल पुगेकाहरुलाई इद्रिसका भतिजा मोहम्मद अफताब आलमका कार्यकर्ताले थर्काए । तत्काल आ–आफ्नो घर फर्कन भन्दै‌ धम्काए ।

“घरघरमा गएर बस्ने भनेर थर्काएपछि घरमा फक्र्यौ, आधा घण्टासम्म गुहार मागेको आवाज आइरहेको थियो”, घटनास्थलबाट फर्किएका रामबहादुर साह भन्छन् । उनका अनुसार, लगभग आधा घण्टापछि घाइतेहरुको चित्कार बन्द भयो ।

स्थानीयको अनुमानमा चित्कार रोक्न घाइतेलाई बेहोस बनाउने सुई दिइएको हुन सक्छ । आलमका कार्यकर्ताले थर्काएपछि घर पुगेका साह फेरि झण्डै ३० जनाको गाउँलेकाे समूह बनाएर फेरि घटनास्थल जाने प्रयास गरेका थिए ।

तर, आलमको घर वरपर सशस्त्र र नेपाल प्रहरी तैनाथ थिए । प्रहरीले अगाडि बढ्न दिएनन् ।

“घटनाबारे तत्कालीन एसपी लक्ष्मण न्यौपाने र प्रमुख जिल्ला अधिकारी दुर्गा भण्डारीलाई मैले नै जानकारी गराएको हुँ”, साह भन्छन् ।

त्यस बेला एसपी न्यौपाने र प्रजिअ भण्डारीले अपराधी समात्ने बताएको हाल समाजबादी पार्टीका नेता रहेका साह बताउँछन् ।

तत्कालीन प्रजिअ भण्डारी, नेपाल प्रहरीका एसपी न्यौपाने र सशस्त्रका एसपी रामकृष्ण लामाले नै प्रमाण नष्ट गर्न मुख्य भूमिका निर्वाह गरेको स्थानीयकाे आरोप छ ।

त्यसबेला आलमका कार्यकर्ताले घरघर पुगेर मुचुल्कामा हस्ताक्षर गर्नेलाई जिउँदो नछोड्ने धम्की दिएका थिए । धम्कीपछि सबै चुप बसे ।

एक स्थानीयका अनुसार, बिस्फोटमा घाइते भएकालाई जलाएर मार्न तत्कालीन एसपी लामाकाे खास सक्रियता थियो । 

आलमका प्रतिद्वन्द्वी तत्कालीन एमालेका उम्मेद्वार शैलेन्द्र साह बम बिस्फोट भएको झण्डै दुई घण्टापछि घटनास्थल नजिक पुगेका थिए । तर, साहलाई पनि प्रहरीले अगाडि बढ्न दिएनन् ।

साहले २५ चैत २०६४ मै जिल्ला प्रशासन कार्यालयमा आलम बिरुद्ध उजुरी दर्ता गराएका थिए । उजुरीमा आलमले भारतबाट गुण्डा ल्याएको, घरमा राखेर बिस्फोटक पदार्थ र हतियार भण्डारण गरेको उल्लेख गरिएको थियो । तर, यसबारे केही सुनुवाई भएन । 

आलमका प्रतिद्वन्द्वी साहलाई समेत फर्काइएपछि सशस्त्र र नेपाल प्रहरीकै स्कर्टिङमा मृतक र घाइतेहरुलाई ट्याक्टरमा हालेर नजिकैको ईटाभट्टीमा लगियो । स्थानीयका अनुसार, राति दुई बजेसम्म ईटाभट्टीबाट धुवाँको मुस्लो आइरहेको थियो ।

 

आलम प्रकरणः मृतक र घाइतेहरुलाई इँटाभट्टासम्म लैजान प्रहरीकै स्कर्टिङ

       अनुसन्धानका लागि आलमलाई सात दिन हिरासतमै राख्न आदेश

आलम पक्राउ विरुद्ध प्रदर्शन रोक्न कांग्रेसद्वारा कार्यकर्तालाई निर्देशन

रौतहटमा कडा सुरक्षा व्यवस्था, कांग्रेस कार्यकर्ताद्वारा प्रदर्शन

कांग्रेस सांसद मोहम्मद अफताब आलम पक्राउ

 

प्रतिकृया दिनुहोस