चितवनमा ट्रकले ठक्कर दिँदा हरिणको मृत्यु

पूर्व–पश्चिम राजमार्ग अन्तर्गत चितवनको रत्ननगरमा ट्रकको ठक्करबाट हरिणको मृत्यु भएको छ। रत्ननगर नगरपालिका–९ सिँचाइगेट अगाडि बुधबार बिहान ट्रकले हरिणलाई ठक्कर दिएको हो।

जिल्ला प्रहरी कार्यालय चितवनका सूचना अधिकारी प्रहरी नायब उपरीक्षक सूर्य थापाका अनुसार, बिहान करीब ४ः३५ बजे रौतहटबाट नुवाकोटका लागि गुडेको ना ६ ख १४६० नम्बरको ट्रकले हरिणलाई ठक्कर दिँदा घटनास्थलमै मृत्यु भएको हो।

घटनापछि फरार चालकलाई प्रहरीले ट्रकसहित भरतपुर महानगरपालिका–१ रामनगरबाट पक्राउ गरेको छ। नवलपरासीको देवचुली नगरपालिका–१ बस्ने २४ वर्षीय अनिल कुमाललाई पक्राउ गरिएको प्रहरीले जनाएको छ।

पक्राउ परेका चालक र ट्रकलाई आवश्यक कारबाहीका लागि जिल्ला वन कार्यालय चितवन पठाइएको थापाले जानकारी दिए।