समाचारसोमबार, १८ कार्तिक , २०७६

महराका पक्षमा ३२ जनाले होइन, पाँच वकिलले बहस गरे

लक्ष्मी बस्नेत

संसद सचिवालयका एक महिला कर्मचारीलाई बलात्कार प्रयास गरेको आरोप लागेका निवर्तमान सभामुख कृष्णबहादुर महरालाई पुर्पक्षका लागि थुनामा राख्न जिल्ला अदालत काठमाडौंले आदेश दिएको छ ।

आइतबार र सोमबार दुई दिन चलेको थुनछेक बहसपछि जिल्ला न्यायाधीश सुदर्शनराज पाण्डेको इजलासले महरालाई थुनामै राखेर अनुसन्धान गर्न आदेश दिएको छ । आदेश पछि महरालाई डिल्लीबजार कारागारमा पठाइनेछ ।

अदालतका सूचना अधिकारी ज्ञानबहादुर कार्कीका अनुसार, न्यायाधीश पाण्डेको इजलासले प्राप्त प्रमाणका आधारमा पुर्पक्षमा पठाउने आदेश दिएको हो ।

१९ असोजमा पक्राउ परेका महरा अब अदालतको फैसला नआएसम्म कारागारमै बस्नेछन् । फैसलाले दोषी ठहर्याए थप सजाय भोग्नेछन्।

दशैं र तिहार परेकाले महराको अनुसन्धानमा ढिलाइ भएको भन्दै प्रहरीले तीन पटक म्याद थप गरी महराको मुद्दा दर्ता गराएको थियो । प्रहरीको सिफारिस अनुसार, महरालाई जबर्जस्तीकरण सम्बन्धी अभियोग लगाइएको छ ।

उक्त अभियोगबारे शुक्रबार महरालाई पाँच घण्टा अदालतले बयान लिएको थियो । स्वास्थ्यमा समस्या देखिएपछि नर्भिक अस्पतालमा उपचारत महराको थुनछेक बहस भने आइतबार मात्रै भयो ।

आइतबार वादी पक्षका वकिलको बहसपछि महरा पक्षका वकिल लव मैनालीले बहस गरेका थिए ।

यो बीचमा महराका पक्षबाट ३२ जना वकिलले बहस गर्ने प्रचार भएको थियो । तर, अधिवक्ता रमण श्रेष्ठले भने ३२ जनाले बहस नगरेको बताए । उनले भने, “आइतबार मैनालीले बहस गर्नुभयो । आज मसहित चार जनाले बहस गर्यौं ।”

महराका पक्षमा मैनाली, श्रेष्ठ, शेरबहादुर केसी, कृष्ण सापकोटा र सविता भण्डारीले बहस गरेका थिए ।

प्रतिकृया दिनुहोस