बन्दाबन्दीका कारण नर्सरी, हाेटल, कार्यालय र घरकाे बगैंचामा गएर फूल तथा बिरुवाकाे स्याहार गरेर गुजारा चलाउने मालीहरुकाे राेजगारी संकटमा परेकाे छ।
कोरोनाभाइरसको संक्रमण फैलनबाट रोक्न सरकारले घोषणा गरेको बन्दाबन्दीको ५२ औं दिन बल्खुकी संगीता महर्जन पैदल हिंडेरै नयाँबजार पुगिन्। बन्दाबन्दी घोषणापछि शुरूका दुई–चार दिन उनी घरैमा बसिन् । तर, बिरुवाले पानी समेत खान पाएन भन्ने पीर लागेपछि उनी हिंड्दै नर्सरी धाउन थालेकी हुन्।
नयाँबजारस्थित कुमारी नर्सरीमा काम गर्दै साेमबहादुर सारु मगर, लक्ष्मी माली र संगीता महर्जन ।
धादिङकी लक्ष्मी तामाङले फूलका बोटहरू स्याहार्न थालेको आठ वर्ष भयो । सबेरै उठ्नु, बोट–बिरुवामा पानी हाल्नु, गोडमेल गर्नु, बिरुवामा मलिलो माटो राख्नु, प्लाष्टिकका स–साना पोकामा माटो भरेर बिरुवा रोप्नु, नचाहिने झार उखेल्नु उनको दैनिकी हो । अहिले उनी नयाँबजारस्थित कुमारी नर्सरीमा काम गर्छिन् । उनी भन्छिन्, “साहुको व्यापार भए न हामीले तलब पाउने हो, व्यापार छैन, तलब पनि छैन ।”
