समाचार सोमबार, चैत १०, २०७६

कोरोना जोखिमका कारण चितवन राष्ट्रिय निकुञ्ज प्रवेशमा रोक, सौराहाका होटल बन्द

रासस

कोरोना जोखिमका कारण चितवन राष्ट्रिय  निकुञ्ज प्रवेशमा रोक, सौराहाका होटल बन्द

नोभल कोरोना भाइरस (कोभिड–१९) को सम्भावित जोखिम बढ्दै गएपछि पर्यटकीय क्षेत्र सौराहाका होटलहरु बन्द भएका छन्। क्षेत्रीय होटल सङ्घ सौराहाका अध्यक्ष दीपक भट्टराईका अनुसार, भाइरसको जोखिम न्यूनीकरण गर्न भन्दै होटलले सूचना टाँसेर सेवा बन्द गरेका हुन्। चितवन राष्ट्रिय निकुञ्जको मुख्य प्रवेशद्वारका रुपमा रहेको सो क्षेत्रमा साना-ठूला गरी ११५ होटल छन्।

घरायसी रुपमा चलाइएका बाहेक अन्य होटलका कर्मचारीलाई बिदा दिएर कुरुवा मात्र राखिएको भट्टराईले जानकारी दिए। पछिल्ला दिनमा पर्यटकको आगमन घट्दै गएपछि सो क्षेत्र सुनसान हुन पुगेको थियो।

यसैबीच, चितवन राष्ट्रिय निकुञ्जभित्र हुने गतिविधिका लागि प्रवेश रोकिएको छ। निकुञ्जका सहायक संरक्षण अधिकृत गोपाल घिमिरेका अनुसार, निकुञ्ज प्रवेशको टिकट काउण्टर बन्द गरिएको छ। यससँगै निकुञ्जभित्रको सफारी, हात्ती शयर, डुङ्गा शयरलगायतका गतिविधि गर्न नपाइने भएको छ। उनले सो भाइरसको जोखिम बढेपछि निकुञ्ज प्रवेशमा रोक लगाइएको जानकारी दिए।

सौराहाको थारु सांस्कृतिक सङ्ग्रहालय पनि बन्द भएको छ। पर्यटक आउने मुख्य मौसममा कोरोना प्रभावले गर्दा सौराहा क्षेत्रका गतिविधि ठप्प बनेको हो।

प्रतिकृया दिनुहोस