समाचार सोमबार, मंसिर २३, २०७६

संघर्षको तीन वर्षमै स्वर्ण  

रासस

संघर्षको तीन वर्षमै स्वर्ण  
तह्रौँ दक्षिण एशियाली खेलकूद प्रतियोगिता (साग) कुस्ती खेलमा स्वर्ण पदक विजेता भीमदत्तनगरकी सङ्गीता धामीको चर्चा शिखरमा चुलिएको छ । 
 
उनले नेपाली कुस्ती खेलको इतिहासमा पहिलो पटक जारी सागमा नेपाललाई स्वर्ण दिलाएकी थिइन् । अहिले उनको गृहनगर खुशियालीले रमाएको छ । 
 
जनकपुरमा गत शनिबार सम्पन्न ५५ किलो तौल समूहतर्फ उनले बङ्गलादेशका सखिरा सरकाररिनेलाई फाइनलमा पराजित गर्दै नेपाललाई महिलातर्फको कुस्ती खेलमा स्वर्ण पदक दिलाइन् । 
 
“धामीको मेहनत, परिश्रम र नियमित प्रशिक्षणले नेपाललाई सफलता हात लागेको हो” प्रशिक्षक राजेन्द्र चन्दले भने ।
 
तीन वर्षअघि हटौँडामा भएको राष्ट्रिय खेलकूद प्रतियोगिताबाट उहाँले कुस्तीमा स्पर्धा थाल्नुभएको थियो । 
 
“तीन वर्षअघि भीमदत्तनगर छेउछाउका स्कूलहरुमा खेलाडी खोज्दै हिँडेका बेला सङ्गीतालाई यहाँको भृकुटीबाट खेलमा ल्याएको हुँ” प्रशिक्षक चन्दले भने, “सङ्गीताको स्वर्णले सबैलाई खुशियाली दिलाएको छ ।” 
 
यसअघि बृहत् आठौँ राष्ट्रिय खेलकूद प्रतियोगितामा पनि संगीताले स्वर्ण पदक हात पारेकी थिइन् ।
 
संगीताले प्रवीणता प्रमाणपत्र तह उत्तीर्ण गरेकी छन् ।  
 
बाह्राँै सागदेखि मात्र महिला कुस्तीलाई प्रतियोगितामा समावेश गरिएको थियो । “बाह्रौँ सागमा पनि सुदूरपश्चिमबाट तीन जना महिला खेलाडीले भाग लिएका थिए” प्रशिक्षक चन्दले भने, “अहिले यहाँबाट सहभागी अधिकांश महिला खेलाडीले नेपाललाई पदक दिलाएका छन् ।” 
 
भीमदत्तनगरका शिवाङ्गी दुबे, अम्बिका भण्डारी र मनिषा सिंह र कोमल खत्रीले पनि पदक प्राप्त गर्न सफल भएका छन् । 
 
“महिलातर्फ सात जनामा छ जना भीमदत्तनगरकै खेलाडी पर्न सफल भएका थिए” चन्दले  भने, “यो ठूलो उपलब्धिको विषय हो ।” 
 
पुरुषतर्फ कुस्तीको ७० किलोतौल समूहमा कास्य पदक भीमदत्तनगरका सुरेश चुनाराले दिलाएका थिए । 

 

प्रतिकृया दिनुहोस