थप समाचार शनिबार, असोज ११, २०७६

ज्ञानेन्द्र शाहीलाई उपचारका लागि काठमाडौं पठाइयो

रासस

गणतन्त्र पक्षधरको आलोचना गर्दै हिँडेका भ्रष्टाचार विरोधी अभियन्ता ज्ञानेन्द्र शाहीमाथि शनिबार चितवनमा साङ्घातिक आक्रमण भएपछि उपचारका लागि काठमाडौं पठाइएको छ ।

भरतपुरको चौबिसकोठीमा उनको समूहले आयोजना गर्न लागेको कार्यक्रम बिथोलिएपछि आफू बसेको होटलबाट बाहिरिने क्रममा दिउँसो उनीमाथि आक्रमण भएको हो ।

जिल्ला प्रहरी कार्यालय चितवनले दिएको जानकारीअनुसार भरतपुरको होटल ग्लोबलबाट बाहिरिने क्रममा बा३ख ८४५८ नंको माइक्रोबसमा आक्रमण भएको हो । युवा समूहले ढुङ्गा, रड, लाठी प्रहार गरी माइक्रोबसभित्र रहेका शाहीसहितको समूहमाथि आक्रमण गरेको हो ।

प्रहरी उपरीक्षक दानबहादुर मल्लका अनुसार घाइते शाही चितवन मेडिकल कलेजको उपचारपछि काठमाडौं गएका हुन् । उनको अवस्था खतरामुक्त रहेको मल्लले जानकारी दिए। शाहीले काठमाडौंको अस्पतालमा उपचार गर्न चाहेको बताइएको छ ।

उनको खुट्टामा चोट लागेको छ भने टाउको र शरीरमा समस्या भएको उनले बताए । आक्रमणमा घाइते भएका अन्य दुईको चितवन मेडिकल कलेजमा उपचार भइरहेको प्रहरी उपरीक्षक मल्लले बताए ।

प्रहरी उपरीक्षक मल्लका अनुसार सो क्रममा आक्रमण गर्ने एक जनालाई पक्राउ गरिएको छ । शाहीमाथि आक्रमण भएको खबर पाउनासाथ उद्धार गरिएको प्रहरी उपरीक्षक मल्लको भनाइ छ ।

त्यसअघि नेपाल कम्युनिष्ट पार्टी (नेकपा) निकट युवाहरूले चौबिसकोठीमा शाहीले सम्बोधन गर्न लागिएको कार्यक्रम बिथोलेका थिए ।

 

प्रतिकृया दिनुहोस