समाचार विहीबार, असोज ९, २०७६

सीआईबीको फरार सूचीमा रहेका शर्माद्वारा शिक्षामन्त्रीलाई कुर्सीबाट हटाउने चेतावनी

रामु सापकोटा

शैक्षिक सत्र २०७६\०७७ का लागि चिकित्सा शिक्षा अध्ययन गर्ने विद्यार्थी भर्ना नलिने चेतावनी दिदै विज्ञप्ति निकालेको एक दिनपछि निजी मेडिकल कलेजका सञ्चालकले शिक्षामन्त्री गिरिराजमणि पोखरेललाई कुर्सीबाट हटाउने धम्की दिएका छन् ।

नाेबेल मेडिकल कलेजका सञ्चालक सुनिल शर्मालाई सम्मानपत्र दिदै शिक्षामन्त्री गिरिराजमणि पाेखरेल । फाइल तस्वीर 

६ असोजमा गृहमन्त्री रामबहादुर थापा र शिक्षामन्त्री गिरिराजमणि पोखरेल लगायत विभिन्न पदाधिकारीहरू सहभागी बैठकले मेडिकल कलेजहरूलाई विद्यार्थीबाट असुलेको अतिरिक्त रकम एक महीनाभित्र समायोजन वा फिर्ता गर्न समयसीमा दियो ।

उक्त बैठकले एक महीनाभित्र शुल्क समायोजन वा फिर्ता नगरे कलेजहरूलाई कारबाही गर्ने निर्णय गरेको थियो ।

सरकारले उक्त निर्णय गरे लगत्तै ८ असोजमा निजी मेडिकल कलेजहरूको छाता सङ्गठन एशोसिएसन अफ प्राइभेट मेडिकल एण्ड डेन्टल कलेज अफ नेपालले शैक्षिक सत्र २०७६\०७७ का लागि विद्यार्थी भर्ना नगर्ने चेतावनी दियो ।

सङ्गठनका तर्फबाट अध्यक्षसमेत रहेका वीरगञ्जको नेशनल मेडिकल कलेजका सञ्चालक बसरुद्दिन अन्सारीले सूचना निकालेर कलेजहरूमाथि चौतर्फी आक्रमण भएको भन्दै यस्तो चेतावनी दिएका हुन् ।

यसैबीच ९ भदौमा राजधानीमा आयोजित एक कार्यक्रममा बोल्दै केन्द्रीय अनुसन्धान ब्यूरो (सीआईबी)को ‘फरार’ सूचीमा रहेका विराटनगरको नोबेल मेडिकल कलेजका सञ्चालक सुनिल शर्माले शिक्षामन्त्री गिरिराजमणि पोखरेललाई कुर्सीबाट हटाउने धम्की दिएका हुन् ।

शर्माले भने, “शिक्षा मन्त्री गिरिराजमणि पोखरेलले अहिलेकै रबैया अपनाउनुभयो र पेलेर जान्छु भनेर सोच्नुभयो भने उहाँलाई कुर्सीबाट निकालेर फ्यालिदिन्छु ।”

कार्यक्रममा बोल्दै निजी मेडिकल कलेज सञ्चालकहरूले सरकारले तोकेको शुल्कमा विद्यार्थी भर्ना गर्न नसक्ने बताए ।

सरकारले कलेजहरूलाई विद्यार्थीबाट असुलेको अतिरिक्त शुल्क एक महीनाको समयसीमा दिएर फिर्ता वा समायोजन गर्न भनेपछि कलेज सञ्चालहरूले शिक्षामन्त्रीलाई पदबाटै हटाउने चेतावनी दिन थालेका हुन् ।

गृहमन्त्री र शिक्षामन्त्री सहित पदाधिकारी सम्मिलित बैठक ।

शिक्षामन्त्रीलाई पदबाट हटाउने चेतावनी दिएका नोबेलका सञ्चालक शर्मा सीबीआईको ‘अपरेसन क्वाक’ को सूचीमा परेपछि फरार भए ।
सीआईबीले उनी फरार भएको भन्दै पक्रिन सकेन ।

उनले विहार इन्टरमिडियट बोर्डबाट ‘प्लस टु’ गरेको नक्कली शैक्षिक प्रमाणपत्र देखाएर एमबीबीएस गरेको पत्ता लागेपछि सीआईबीले ‘क्वाक’ को सूचीमा राखेर ३ असार २०७३ मा पक्राउ गर्ने तयारी गरेको थियो ।

त्यो सुइँको पाएपछि शर्मा जापान भागेका थिए । नेपाल मेडिकल काउन्सिल अनुसार शर्माले चीनबाट लिएको एमबीबीएसको प्रमाणपत्र नक्कली हो।

नोबेल मेडिकल कलेजका शर्मा कांग्रेसको महासमिति सदस्य पनि हुन् ।

कांग्रेस केन्द्रीय सदस्य शेखर कोइरालाले धरानको बीपी कोइराला स्वास्थ्य विज्ञान प्रतिष्ठानका उपकुलपति हुँदा शर्मालाई एमबीबीएस अध्ययनका लागि नेपाली विद्यार्थी चीन पठाउनेदेखि महासमिति सदस्य बन्नसम्म सहयोग गरेका थिए ।

शर्माले नोबेल मेडिकल कलेजको शेयर हत्याउन माओवादीका नेता वर्षमान पुन मार्फत वाईसीएल परिचालन गरेर कलेज सञ्चालक नवराज पाण्डे र ज्ञानेन्द्र गिरीलाई काठमाडौं विमानस्थलबाट अपहरण गरेर काभ्रेको कामीडाँडामा बन्धक बनाएका थिए ।

चितवन मेडिकल कलेजका विद्यार्थी आन्दाेलनमा ।

नक्कली प्रमाणपत्र प्रकरण: सिआईबीको लिष्टमा डा. सुनिल शर्मा !

माफियालाई संरक्षण

प्रतिकृया दिनुहोस