थप समाचार सोमबार, चैत १०, २०७६

ढुवानी सेवा नरोक्न महासंघको आग्रह

रासस

नेपाल ट्रक यातायात व्यवसायी महासंघले ढुवानी सेवालाई निर्वाध रुपमा सञ्चालन गर्न सम्पूर्ण व्यवसायीलाई आग्रह गरेको छ ।

महासंघले विज्ञप्ति जारी गरी ढुवानी सेवा अत्यावश्यक सेवा अन्तर्गत पर्ने भएकाले यसलाई निर्वाध रुपमा सञ्चालन गर्न व्यवसायीलाई आग्रह गरेको हो ।

गत शुक्रबार सरकारले आइतबारदेखि अत्यावश्यक बाहेक अरु सेवा सञ्चालनमा रोक लगाउने घोषणा गरेको थियो ।

महासंघका महासचिव राजेन्द्रविक्रम बानियाँले कोभिड–१९ (कोरोना भाइरस) को सम्भावित जोखिम विरुद्ध एकजुट हुँदै महासंघले आफ्नो तवरबाट सरकारलाई साथ र सहयोग गर्ने बताए ।

“ढुवानी व्यवसाय पनि अत्यावश्यक सेवा हो, यसलाई निर्वाध ढङ्गले सञ्चालन गर्न व्यवसायीलाई आग्रह गर्दछौँ”, उनले भने ।

महासंघले संस्थामा आबद्ध करिव ६५ हजार व्यवसायीलाई आपूर्ति व्यवस्थालाई सहज पार्नका लागि सबैसँग अनुरोध समेत गरेको छ ।

राजधानी लगायत देशका हरेक क्षेत्रमा ढुवानी सहज बनाई आवश्यक साथ र सहयोग गर्न महासंघ तल्लीन रहेको महासंघले जनाएको छ ।

प्रतिकृया दिनुहोस