कला/साहित्य शुक्रबार, पुस ११, २०७६

भारतीय गायिका आशा भोस्लेद्वारा राष्ट्रपति भण्डारीसँग भेट

रासस

भारतीय गायिका आशा भोस्लेद्वारा राष्ट्रपति भण्डारीसँग भेट
राष्ट्रपति भवन शीतलनिवासमा शुक्रबार राष्ट्रपति विद्यादेवी भण्डारीसँग भेटपछि भारतीय गायिका आशाभोस्ले । तस्वीर: साधनाकला केन्द्र \रासस

भारतीय चर्चित गायिका आशा भोस्लेले शुक्रबार राष्ट्रपति विद्यादेवी भण्डारीसँग भेट गरेकी छन् । भोस्लेले राष्ट्रपति निवास शीतल निवासमा पुगी राष्ट्रपतिसँग भेट गरेकी हुन् ।

साधना कला केन्द्रको आयोजनामा शनिबार हुने एक साङ्गीतिक कार्यक्रममा आफ्नो प्रस्तुति दिन भोस्ले बुधबार नेपाल आएकी हुन् ।

राष्ट्रपति भण्डारीले भोस्लेले नेपाली गीतसङ्गीतको क्षेत्रमा पुर्‍याएको योगदानको प्रशंसा गरेको भेटघाटमा संलग्न केन्द्रका संस्थापक निर्देशक मिलन मोक्तानले जानकारी दिए ।

“उहाँका गीतबाट राष्ट्रपति भण्डारी निकै प्रभावित हुनुहुँदो रहेछ”, मोक्तानले भने, “भोस्लेसँग भेट गर्न पाउँदा राष्ट्रपति धेरै खुशी हुनुभयो ।” भेटमा देशको समसामयिक घटनाक्रमका विषयमा पनि छलफल भएको उनले जानकारी दिए।

“भोस्लेले नेपालमा आफूले सोचेभन्दा धेरै सम्मान पाएको विषय राष्ट्रपतिलाई अवगत गराउनुभयो”, मोक्तानले भने, “विमानस्थलमा नेपाली संस्कृतिले गरेको स्वागत स्मरणयोग्य रहेको उल्लेख गर्नुभयो ।”

शनिबार हुने कार्यक्रममा गायिका भोस्लेले ‘यो हो मेरो प्राणभन्दा प्यारो माइतीघर, म प्यार बेचिदिन्छु, गैरीखेतको शिरै हान्यो, मोहनी लाग्ला है’ लगायतका आफूले स्वर दिएका थुप्रै नेपाली गीत गाउने कार्यक्रम रहेकाे र उनलाई नेपालका ३५ जना कलाकारले पनि साथ दिने बताइएकाे छ । 

केन्द्रको निमन्त्रणामा अनुराधा पोडवाल, सञ्जीवनी, दीपानारायण झा, साधना सरगम, इन्द्रजीत मिजारलगायत कलाकार पनि नेपाल आएका छन् ।

प्रतिकृया दिनुहोस