अनियन्त्रित ट्रक-टिपरको आउजाउको प्रभाव वायु प्रदूषणमा मात्र सीमित छैन, स्वास्थ्यमा पनि असर परिरहेको छ।
झट्ट हेर्दा दक्षिण भारतीय फिल्मको दृश्य जस्तो लाग्छ। राति ९ बजेपछि ट्रक र टिपरका ताँती हुन्छन्। बेतोडले बहकिन्छन्।
ललितपुरको नख्खु खोला करिडोरमा ट्रक र टिपरको ताँती आक्कलझुक्कल देखिने पनि होइन। हरेक रातको कुरा हो। धूलो र धूवाँको स्रोत बन्न पुगेका ट्रक र टिपरको कर्कश ध्वनिले राति सुत्न समेत सकिंदैन।
ट्रक-टिपरको अनियन्त्रित आउजाउको प्रभाव वायु प्रदूषणमा मात्र सीमित छैन, स्वास्थ्यमा पनि असर परिरहेको छ। ललितपुर महानगरपालिका-१२ की नानुमैयाँलाई दमको समस्या छ। घर थर्किनेगरी टिपर गुड्ने त्यही सडकमा उनी पनि पसल चलाउँछिन्। त्यसले झन् समस्या थपेको उनी सुनाउँछिन्।
ट्रक र टिपर चालकको व्यवहारबाट स्थानीय वाक्कदिक्क छन्। यस्तो लाग्छ, चालकका लागि आसपासका मान्छे सजीव नै होइनन्। मान्छेलाई मान्छे नठान्ने चालकले कार, मोटरसाइकल, साइकल जस्ता साधनलाई त गन्ने कुरै भएन। धूलो-धूवाँले सर्वसाधारणमा आँखा र छालामा समस्या हुनुका साथै रुघाखोकी देखा पर्ने जनस्वास्थ्यविद्हरू बताउँछन्।
जमीन थरथर काँप्ने गरी ट्रक-टिपर बेतोडले हुइँकिने गरेको स्थानीय बासिन्दा बताउँछन्। आवासीय क्षेत्रका ज्येष्ठ नागरिकमा शारीरिक समस्याका साथै मानसिक समस्या निम्तिएको देखिन्छ।
छोटो बाटो प्रयोग गर्ने नाममा चालकहरू बस्ती बस्ती अनियन्त्रित रूपमा टिपर कुदाउँछन्। अत्यधिक हर्नका कारण कानमा पनि समस्या हुने गरेको डा. शेरबहादुर पुन बताउँछन्।
गोदावरी नगरपालिकाको फर्सीडोलबाट प्रवेश गरेर बुङमती बजार हुँदै आउने टिपरले त्राहिमाम् बनाएको स्थानीय बासिन्दा गुनासो गर्छन्। बुङमती बजारबाट आउँदा करीब तीन हजार २०० मिटर कालोपत्रे सडक छ। विकल्प हुँदाहुँदै सम्पदा बस्तीबाट आउनेलाई प्रहरीले समेत नियमन नगरेको वडाध्यक्ष सागर तुलाधर बताउँछन्। स्थायी समाधानका लागि स्थानीय सरकार र सडक विभाग लगायत सरकारी निकायको उचित समन्वय नहुँदा समस्या कायम छ।
VIDEO
