समाचार विहीबार, साउन २०, २०७३

उड्दाउड्दै विमानको इन्जिन बन्द भएपछि नदीमा अवतरण: चालक

हिमालखबर


हुम्लाबाट सुर्खेत जाँदै गरेको मकालु एयरको ‘नाइनएनएकेसी’ विमानको इन्जिनमा खराबी आएपछि आज आपारह्न सिमिकोट गाविसको राउटेराना भन्ने स्थानमा दुर्घटना भएको छ । 

सिमिकोट विमानस्थलबाट सुर्खेतका लागि ३:३० बजे उडेको करिब पाँच मिनेटमै विमानको इन्जिन एक्कासी बन्द हुँदा सुरक्षित अवतरण गर्ने क्रममा दुर्घटना भएको हो । 

“एघार हजार ५०० फिटको उचाइमा रहेको विमानको एक्कासी इन्जिन बन्द भयो, पुनः स्टार्ट गर्न खोज्यौँ भएन, त्यसपछि सुर्खेत पुग्न पनि टाइम लाग्ने र हुम्ला फर्कन पनि नसक्ने अवस्था आएपनि विमानलाई कर्णाली नदीमा सुरक्षित अवरण गर्न खोज्दा दुर्घटना भयो” पाइलट साङ्गे लामाको भनाई उद्धृत गर्दै प्रमुख जिल्ला अधिकारी डा कृष्णबहादुर घिमिरेले बताए । 

“विमानलाई खोलामा सेफ ल्यान्डिङ गर्दा दुवैजना बहोस भयौँ, केहीबेरमा होस आएर पौडिँदै खोलाबाहिर निस्कन सफल भयौँ ।” चालक लामाले भने । 

घटना लगत्तै सिमिकोटमा रहेको सिम्रिक एयरको हेलिकप्टरले घाइते चालकको उद्धार गरेको थियो । दुर्घटनामा दुवै पाइलट सामान्य घाइते भएको र जिल्ला अस्पताल हुम्लामा उपचारपछि अहिले थप स्वास्थ्य परीक्षणका लागि सोही हेलिकप्टरमार्फतै नेपालजन्ज मेडिकल कलेज पठाइएको डा घिमिरेले जानकारी दिए । 

अहिले दुर्घटनाग्रस्त विमानलाई कर्णाली नदीले बगाएको जानकारी आफूहरुले पाए पनि घटनास्थलबाट थप जानकारी नआएको उनले बताए ।

रासस 

 

प्रतिकृया दिनुहोस