खेलकुद शनिबार, मंसिर ७, २०७६

साग क्रिकेटमा नेपालको पहिलो प्रतिद्वन्द्वी श्रीलङ्का

हिमालखबर

१५ मंसीरबाट शुरु हुने १३औँ दक्षिण एशियाली खेलकूद (साग) अन्तर्गत पुरुष टी–ट्वान्टी क्रिकेट र महिला टी–ट्वान्टी क्रिकेटको खेल तालिका सार्वजनिक भएको छ ।

शनिबार सार्वजनिक तालिकाअनुसार पुरुष टी–ट्वान्टी क्रिकेटमा नेपालले पहिलो प्रतिद्वन्दी टेष्ट राष्ट्र श्रीलङ्कालाई पाएको हो । नेपाल र श्रीलङ्काबीचको खेल १७ मंसीरमा हुनेछ ।

सागको पुरुषतर्फ विभिन्न पाँच टोली सहभागी छन् । नेपालसहित श्रीलङ्का, बङ्गलादेश, भूटान र माल्दिभ्स छन् । भारत र पाकिस्तान भने सहभागी छैनन् ।

नेपालले १९ मंसीरमा भूटानसँग दोस्रो खेल खेल्नेछ भने तेस्रो खेल २० मंसीरमा माल्दिभ्सको सामना गर्नेछ ।

नेपालले अन्तिम खेल २१ मंसीरमा बङ्गलादेशसँग खेल्नेछ । राउण्ड रोबिनको आधारमा हुने पुरुष क्रिकेटको शीर्ष दुई टोलीले स्वर्ण पदकका लागि प्रतिस्र्धा गर्नेछन् ।

तेस्रो र चौथो स्थानमा रहनेले कास्य पदकको लागि प्रतिस्पर्धा गर्नेछन् । उक्त प्रतियोगिताको खेल कीर्तिपुरस्थित त्रिवि क्रिकेट मैदानमा हुनेछ ।

शनिबार नै सार्वजनिक गरेको महिला टी–ट्वान्टी क्रिकेटमा नेपालले पहिलो प्रतिद्वन्द्वी माल्दिभ्स पाएको छ । विभिन्न चार राष्ट्र सहभागी उक्त प्रतियोगिताअन्र्गत नेपाल र माल्दिभ्सबीचको खेल १६ मंसीरमा हुनेछ ।

नेपालले दोस्रो खेल १८ गते बङ्गलादेशसँग खेल्नेछ भने २० गते श्रीलङ्कासँग अन्तिम खेल खेल्नेछ ।

महिला क्रिकेटमा चार टोलीले प्रतिस्पर्धा गर्नेछन् । खेलमा भारत, पाकिस्तान र भुटानले सहभागिता जनाएका छैनन् ।

राउण्ड रोबिनको आधारमा हुने महिला क्रिकेटको शीर्ष दुई टोलीले स्वर्ण पदकको लागि प्रतिस्पर्धा गर्नेछन् । त्यस्तै तेस्रो र चौथो स्थानमा रहने टोलीले कास्य पदकका लागि भिड्नेछन् । प्रतियोगिताको खेल पोखरा रङ्गशालामा हुनेछ ।

प्रतिकृया दिनुहोस