समाचार सोमबार, कात्तिक २५, २०७६

आलम पक्षका चार अधिवक्ताको बहसः ‘प्रमाण बिना फसाउन खोजियो’

हिमालखबर

फरहदवा नरसंहार आरोपमा पक्राउ परेका मोहम्मद आफताव आलमको थुनछेक बहसमा सोमबार चार अधिवक्ताले बहस गरेका छन् ।

जिल्ला अदालत रौतहटमा आलम पक्षका चार जना अधिबक्ताले बहस गरेपछि बहस हेर्दाहेर्दैमा राखिएको छ । सोमबार अधिबक्ता शेरबहादुर केसी लगायतले आलमको पक्षमा बहस गरे ।

बहसका क्रममा उनीहरुले आलमलाई नियोजित रुपमा फसाउने प्रयास भएको तर्क गरेका छन् । “प्रमाण छैन, तर फसाउने उद्देश्यले आरोप लगाइयो”, अधिबक्ता केसीले तर्क गरे ।

आलम पक्षका अधिबक्ताहरुको बहस नसकिएकाले मंगलबार बाँकी बहस गर्नेगरी सोमबारको थुनछेक बहस सकिएको छ । सर्वस्व सहित जन्मकैदको माग दावी सहित दायर मुद्दामा शुक्रबार वादी पक्षका अधिबक्ताहरुले बहस गरेका थिए ।

शनिबार र आइतबार अदालत नखुलेकाले सोमबार मात्रै प्रतिबादी पक्षका अधिबक्ताले बहस गरेका हुन् । २७ चैत २०६४ मा आलमले बम बिस्फोटबाट घाइते भएकाहरुलाई जिउँदै ईटाभट्टामा जलाएको आरोप लागेको छ ।

१२ वर्ष अगाडि भएको नरसंहार आरोपमा आलमलाई गत २६ असोजमा प्रहरीले पक्राउ गरेको हो । पक्राउ पछि आलमलाई हिरासतमा लिएर अनुसन्धान गरिएको छ । आलम बिरुद्ध कर्तव्य ज्यान, हातहतियार तथा खरखजना मुद्दा दायर गरिएको छ ।

पूर्व मन्त्री आलमले २०६४ को संविधानसभा निर्वाचनमा बुथ कब्जा गर्ने उद्देश्यले बम बनाउन परिचालन गरेका आफ्नै कार्यकर्तालाई जिउँदै जलाएको आरोप लागेको छ ।

प्रतिकृया दिनुहोस