समाचार आइतबार, कात्तिक २४, २०७६

उम्मेद्वारी फिर्ताका लागि हेलिकोप्टर पुगे पनि नेकपामा बागी उम्मेद्वार कायमै

हिमालखबर

बाग्लुङ–२, (ख) को प्रदेशसभा सदस्यका लागि सत्तारुढ नेपाल कम्युनिष्ट पार्टी (नेकपा) बाट बागी उम्मेद्वार कायम भएको छ ।

शेरमानकाे उम्मेद्वारी फिर्ता गराउने प्रयासका लागि बाग्लुङ पुगेकाे हेलिकाेप्टर । तस्वीरः उजीर मगर

निर्वाचन आयोगले दिएको समय सकिदा समेत उम्मेद्वारी फिर्ता नभए पछि बागी उम्मेद्वार कायम भएको हो ।

आगामी १४ म‌ंसीरमा हुने उपनिर्वाचनमा राष्ट्रिय जनमोर्चा सँग गठबन्धन गर्दै बाग्लुङमा खिमबिक्रम शाहीलाई उम्मेद्वार बनाएको नेकपाका नेता शेरमान घर्तीमगरले बागी उम्मेद्वारी दर्ता गराएका छन् ।

अन्तिम समयसम्म नेकपा नेतृत्वले उम्मेद्वारी फिर्ता लिन आग्रह गरे पनि शेरमानले उम्मेद्वारी फिर्ता गरेनन् । उनको उम्मेद्वारी फिर्ता गराउन बाग्लुङमा हेलिकोप्टर नै लगिएको थियो । ढोरपाटनका मेयर देवकुमार नेपालीले दरबार होटलमाथि हेलिकोप्टर राखिएकाे थियाे ।

तर, निर्वाचन आयोगले दिएको आइतबार एक बजेसम्म उम्मेद्वारी फिर्ता गराउने समय सकियो । शेरमानले उम्मेद्वारी फिर्ता लिएनन् । शेरमानको उम्मेद्वारी दर्ता गराउन नेकपा बाग्लुङकै नेताहरु लागि परेका छन् ।

सधैं जनमोर्चाको उम्मेद्वारलाई भोट हाल्न नसकिने भन्दै नेकपा बाग्लुङका केही नेताहरुले बागी उम्मेद्वार दर्ता गराएका हुन् । नेकपाकै नेता दधिराम अर्याल प्रस्तावक र रिमबहादुर विश्वकर्मा समर्थक रहेर शेरमान घर्तीमगरको उम्मेद्वारी दर्ता भएको छ ।

२०७४ काे निर्वाचनमा वाम गठबन्धनका तर्फबाट जनमाेर्चाका टेकबहादुर घर्तीमगरले निर्वाचन जितेका थिए । तर. उनकाे कलेजाे समस्याबाट मृत्यु भए पछि उपनिर्वाचन हुन लागेकाे छ । 

 

प्रतिकृया दिनुहोस