समाचार शुक्रबार, कात्तिक ८, २०७६

आलमलाई आठ दिन म्याद थप

हिमालखबर

रौतहट जिल्ला अदालतले राजपुर बमकाण्डका मुख्य आरोपी सांसद महम्मद आफताब आलमलाई थप आठ दिन नियन्त्रणमा राखेर अनुसन्धान गर्न म्याद थपेको छ । जिल्ला प्रहरी कार्यालय रौतहटले आलमलाई शुक्रबार अदालतमा पेश गरेपछि आठ दिन म्याद थपेको हो ।

अनुसन्धान कार्य भइरहेको र अनुसन्धानमा धेरै काम गर्न अझै बाँकी रहेको भन्दै जिल्ला सरकारी वकिल कार्यालय मार्फत जिल्ला प्रहरी कार्यालय रौतहटले अदालतलाई म्याद थप गर्न आग्रह गरेको थियो ।

अदालतले आठ दिन म्याद थप गर्ने निर्णय गरेपछि सञ्चारकर्मीसित संक्षिप्त प्रतिक्रिया दिँदै आलमले राजनीतिक प्रतिशोध लिन हुँदै नभएको घटनामा आफूलाई पक्राउ गरिएको बताएका छन् ।

आलमलाई तेस्रोपटक म्याद थपका लागि शुक्रबार अदालतमा पेश गरिएको हो । २६ असोजमा पक्राउ गरिएपछि प्रहरी नियन्त्रणमा रहेका आलमले अनुसन्धानमा खासै सहयोग नगरेकाले अनुसन्धान लम्बिएको प्रहरीको जिकिर रहेको छ ।

सांसद आलमलाई म्याद थपका लागि तेस्रोपटक अदालतमा पेश गरिने दिन नेपाली कांग्रेस रौतहटले सदरमुकाम गौरमा मौन जुलुस प्रदर्शन गरेको छ ।

सांसद आलमको रिहाइको माग गर्दै गरिएको प्रदर्शनमा हजारौंले सहभागिता जनाएका छन् । सांसद आलम निर्दोष रहेको प्रदर्शनकारीको भनाइ छ ।

यसैबीच राजपुर बमकाण्डका भारतीय पीडितसित प्रहरीले सम्पर्क स्थापित गरिरहेको छ । बमकाण्डमा मारिएका भनिएका भारतीयका आफन्त र घटनाका घाइतेसित प्रहरीले सम्पर्कको प्रयास गरिरहेको छ । घटनामा दुई नेपाली र छजना भारतीयको मृत्यु भएको भनिएको थियो ।

बमकाण्डका एकजना प्रत्यक्षदर्शी एवम् घाइते सर्लाही गोडैता नपा २ का सफिक महम्मदको उपचार भारतको मोतिहारीमा भएको थियो । महम्मदको उपचार भएको अस्पतालमा अन्य केही घाइतेको पनि उपचार गरिएको थियो ।

घटना भएको लामो समय बितिसकेकाले घटनाका पीडित आफन्त र घाइतेसित सम्पर्क गर्न प्रहरीलाई केही अप्ठ्यारो परेको छ तर बमकाण्डमा मारिएका नेपालीका आफन्त, घटनाका घाइते तथा प्रत्यक्षदर्शीसमेतको सहयोग लिएर रौतहट प्रहरी भारतीय मृतकका आफन्त एवम् घाइतेसित सम्पर्क गर्ने प्रयास गरिरहेको छ ।

२६ असोजमा पक्राउ परेका सांसद आलमले पोलिग्राफ परीक्षण गर्न नमानेको र घटना हुँदै नभएको बताएपछि प्रहरीले घटनालाई पुष्टि गर्ने विभिन्न बलियो प्रमाणको खोजीको क्रममा भारतीय पीडित परिवारसित सम्पर्कको प्रयास पनि थालेको हो ।

 

प्रतिकृया दिनुहोस