समाचारमंगलबार, ५ कार्तिक , २०७६

भारतीय राष्ट्रपति नेपाल आउने

हिमालखबर

भारतीय राष्ट्रपति रामनाथ कोविन्द नेपाल आउने भएका छन् । राष्ट्रपति विद्यादेवी भण्डारीले दिएको निमन्त्रण स्वीकार गर्दै कोविन्द नेपाल आउने भएका हुन् ।

जापानका सम्राट् नोरुहितोको राज्याभिषेकका क्रममा जापान पुगेकी राष्ट्रपति भण्डारीले त्यही मंगलबार बिहाने भेटका क्रममा नेपाल भ्रमणको निमन्त्रणा दिएकी हुन् । निमन्त्रणा स्वीकार गर्दै राष्ट्रपति कोविन्दले कुटनीतिक तहबाट नेपाल भ्रमणको व्यवस्था मिलाइने बताए ।

दक्षिणी छिमेक भारतका राष्ट्रपतिसँग समकक्षी भण्डारी राष्ट्रपति निर्वाचित भएपछि पहिलो भेट भएको हो । सांसद हुँदा कोविन्द सन् २००६ मा नेपाल आएका थिएख । तर, राष्ट्रपतिका रुपमा भने पहिलो पटक भ्रमण गर्ने बताएका हुन् ।

आयोजनामा चासो

भेटका क्रममा दुवै पक्षबाट नेपाल भारत सम्बन्धमा सन्तोष व्यक्त गर्दै यसलाई अझ व्यापक, फराकिलो, गहन र बहुआयामिक बनाइने दृढता व्यक्त गरिएको छ ।

भारतबाट सहयोग प्राप्त आयोजनाहरुले नेपालमा तीव्रता पाएकाबारे छलफल हुनाका साथै पेट्रोलियम पाइपलाइन निर्धारित समयभन्दा छिटो बन्नु नमूनायोग्य काम भएको भेटवार्तामा उल्लेख गरिएको परराष्ट्र सचिव शङ्करदास वैरागीले बताए ।

दुवै पक्षले अन्य आयोजना पनि छिट्टै बन्ने विश्वास व्यक्त गरे । दुवै देशका प्रधानमन्त्रीहरुको गत वर्ष अप्रिल र जुनमा भएको भेटघाटपछि अरुण तेस्रो, पञ्चेश्वर, तराई सडक, एकीकृत भन्सार जाँचचौकी, रेल्वे आदि परियोजनाले तीव्रताका साथ गति लिएको जनाइएको छ ।

नेपालले गुरुनानकको जन्मजयन्तीमा तीन थरि सिक्का निष्काशन गरेकामा र गान्धी जयन्तीमा प्रकाशित कृतिमा प्रधानमन्त्री केपी ओली शर्माको लेख समेटिएकामा पनि भारतले नेपाललाई धन्यवाद दिएको छ ।

अवसरमा नेपालका तर्फबाट गृहमन्त्री रामबहादुर थापा, परराष्ट्र सचिव शङ्करदास वैरागी, जापानका लागि नेपालका राजदूत प्रतिभा राणा, राष्ट्रपति कार्यालयका सचिव डा हरि पौडेल, राष्ट्रपतिका प्रमुख स्वकीय सचिव भेषराज अधिकारी तथा परराष्ट्र मन्त्रालय र राष्ट्रपति कार्यालयका उच्चपदस्थ अधिकारी एवं भारतीय पक्षबाट विदेश सचिव विजय गोख्ले, जापानका लागि भारतीय राजदूत सञ्जय वर्मालगायत सहभागी थिए ।

प्रतिकृया दिनुहोस