समाचार आइतबार, कात्तिक ३, २०७६

बयानका लागि महरा सरकारी वकिलको कार्यालयमा

हिमालखबर

संसद सचिवालयकी एक महिला कर्मचारीलाई जबरजस्ती करणी प्रयासको आरोप लागेका निवर्तमान सभामुख कृष्णबहादुर महरालाई बयानका लागि जिल्ला सरकारी वकिलको कार्यालय, काठमाडौंमा लगिएको छ । प्रहरीले महरालाई बबरमहलस्थित सरकारी वकिलको कार्यालयमा लगेको हो ।

दुई पटक लगिए पनि स्वास्थ्यका कारण आफू बयान दिन नसक्ने बताएपछि बयान भएको थिएन । एक सरकारी वकिलले भने, "उहाँलाई आज पनि ल्याइएको छ, अनौपचारिक कुराकानी भइरहेको छ, औपचारिक बयान हुन्छ हुँदैन अहिल्यै भन्न सकिदैन ।" यसअघि पनि दुई पटक महराले बयान दिन मानेका थिएनन् ।

सरकारी वकिलको कार्यालयबाट उनलाई अदालत पनि उपस्थित गराईंदैछ । उनको स्वास्थ्यका कारण भन्दै यसअघि औपचारिक बयान लिन बाँकी रहेकाले थुनामै राखेर अनुसन्धानका लागि म्याद थप गर्न अदालत लैजान लागिएको हो ।

जिल्ला अदालत काठमाडौंले २८ असोजमा जबरजस्ती करणी उद्योगको मुद्दामा अनुसन्धानका लागि महरालाई थप तीन दिन थुनामा राख्न अनुमति दिएको थियो । त्यो समय सकिएकाले आज फेरि अदालत उपस्थित गराउन लागिएको महानगरीय प्रहरी परिसर काठमाडौंले जनाएको छ ।

जबरजस्ती करणी उद्योगमा बढीमा २५ दिन न्यायिक हिरासतमा राखेर अनुसन्धान गर्न सकिने कानुनी प्रावधान छ । महरा पक्राउ परेको १५ दिन भइसके पनि उनीसँग औपचारिक बयान नभएकाले अनुसन्धान बाँकी रहेको प्रहरीको भनाइ छ ।

एक महिला कर्मचारीले १२ असोजमा महराले आफूलाई जबरजस्ती करणी गरेको बताएको घटना भोलिपल्ट सार्वजनिक भएको थियो । ती महिलाले महानगरीय प्रहरी प्रहरी वृत्त बानेश्वरमा १७ असोजमा जबरजस्ती करणी उद्योगमा जाहेरी दिएकी छिन् ।

प्रतिकृया दिनुहोस