अग्नि सापकोटा विरुद्धको ज्यान मुद्दामा निर्णय सुनाउने मिति तेस्रो पटक सर्यो
सर्वोच्च अदालतले नेकपा (माओवादी केन्द्र)का उपाध्यक्ष अग्नि सापकोटा विरुद्धको ज्यान मुद्दामा फैसला सुनाउने मिति तेस्रो पटक सारेको छ।
यस मुद्दामा सर्वोच्चले बुधबार फैसला सुनाउन पेशी तोकेको थियो। सर्वोच्च अदालतका प्रधानन्यायाधीश विश्वम्भरप्रसाद श्रेष्ठ, न्यायाधीशहरू प्रकाशमान सिंह राउत, सपना प्रधान मल्ल, प्रकाशकुमार ढुंगाना र कुमार रेग्मीको संवैधानिक इजलासले निर्णय सुनाउने मिति सारेको हो।
१२ वर्षअघिको यस मुद्दामा सर्वोच्च अदालतको संवैधानिक इजलासले गत जेठ १२ मा अन्तिम सुनुवाइ गरेको थियो। त्यो दिन सुनुवाइ सकिए पनि निर्णय सुनाउने मिति जेठ २३ गतेलाई तोकेको थियो।
त्यो दिन निर्णय नगरी सर्वोच्चले साउन २३ मा सारेको थियो। त्यस दिन पनि फैसला आएन भने अर्को मिति आजलाई तोकेको थियो। आज पनि निर्णय नसुनाएर संवैधानिक इजलासले तेस्रो पटक मिति सारेको हो। निर्णय सुनाउन अर्को पेशी भने तोकिएको छैन।
सशस्त्र द्वन्द्वको वेला काभ्रेका अर्जुन लामाको अपहरणपछि हत्या गरेको आरोपमा अर्जुनकी पत्नी पूर्णिमायाले सापकोटा सहित माओवादी नेता-कार्यकर्ता विरुद्ध किटानी जाहेरी दिएकी थिइन्। तर प्रहरीले जाहेरी नै नलिएपछि सर्वोच्चमा मुद्दा परेको थियो। त्यसपछि सर्वोच्च अदालतले २०६४ सालमा जाहेरी दर्ता गर्न आदेश दिएको थियो।
सर्वोच्चको आदेशपछि जिल्ला प्रहरी कार्यालय, काभ्रेमा जाहेरी दर्ता भएको थियो। सापकोटा विरुद्ध पक्राउ पुर्जी पनि जारी भएको थियो। तर २०६८ सालमा बाबुराम भट्टराई नेतृत्वको सरकारले पक्राउ पुर्जी नै तामेलीमा राख्ने निर्णय गरेको थियो। त्यति वेला सापकोटा सञ्चारमन्त्री थिए।
पूर्णिमायाले सरकारको निर्णय बदर गरेर सापकोटालाई कारबाहीको दायरामा ल्याउन माग गर्दै २०६९ सालमा रिट दायर गरेकी थिइन्। २०७२ चैतमा न्यायाधीशद्वय सुशीला कार्की र ओमप्रकाश मिश्रको संयुक्त इजलासले संवैधानिक इजलासमा सुनुवाइका लागि पठाएको थियो।
त्यसपछि संवैधानिक इजलासमा २० पटक पेशी तोकिए पनि धेरैजसो इजलासले हेर्न भ्याएन। गत वैशाख १२ गते भने यो मुद्दालाई ‘हेर्दाहेर्दै’ मा राखेर सुनुवाइ थालिएको थियो।
गत जेठ २३ गतेको संवैधानिक इजलासले निर्णय सुनाउने तय गरेको थियो। त्यसयता निर्णय सुनाउने मिति सारिंदै आएको छ। सापकोटा पूर्व सभामुख हुन्।
-1725708169.jpg)
-1725683527.jpg)
