समाचार शुक्रबार, भदौ ६, २०७६

कम्युनिष्ट राजा महाराजाजस्तो बने जनताले लखेट्छन्ः अध्यक्ष दाहाल

हिमालखबर

नेपाल कम्युनिष्ट पार्टी (नेकपा)का अध्यक्ष पुष्पकमल दाहालले जनताको चाहना पूरा गर्न नसके प्राप्त उपलब्धि गुम्ने बताएका छन् । ललितपुरमा आयोजित एक कार्यक्रममा अध्यक्ष दाहालले कम्युनिष्ट नेताहरुले जनताको भाषा बोल्न छोडेपछि सत्ता पनि नटिक्ने बताए ।

“सोभियत संघलगायत मुलुकमा कम्युनिष्ट सत्ता ढल्नुको कारण कम्युनिष्ट नेताहरु विकृत भएर नै हो”, अध्यक्ष दाहालले भने, “सत्तामा गएपछि विकृत बन्ने भएपछि एउटा गोली पनि नचलाई सत्ता उल्टाइदिने गरेको उदाहरण छ ।”

अध्यक्ष दाहालले कम्युनिष्ट नेताहरु राजा महाराजाजस्तो हुँदै गएपछि जनताले लखेट्ने समेत बताए । उनले पार्टीभित्र अनुशासन विस्तारै खस्कँदै गएको चिन्ता व्यक्त गरे ।

“हिजो हामी निकै अनुशासित थियौँ, आत्म अनुशासनबाट मात्र हामी अहिलेको अवस्थामा आइपुगेका हौं”, उनले भने, “आज अनुशासनको स्तर गिरेर जसलाई जे मन लाग्यो बोल्ने, सामूहिक हितलाई बेवास्ता गर्ने प्रवृत्ति बढेको छ । यसलाई परिवर्तन गर्नुपर्छ ।”

विगतमा सामूहिक निर्णय, व्यक्तिगत जिम्मेवारीका साथ कम्युनिष्ट पार्टी चल्दै आएको उल्लेख गर्दै अध्यक्ष दाहालले भने, “आजकल त्यो उल्टिएको छ । व्यक्तिगत निर्णयको जिम्मेवारी सबैले लिनुपर्ने । यो निकै उल्टो भएको छ । यो प्रवृत्तिलाई सच्याउने ऐतिहासिक जिम्मेवारी हाम्रो काँधमा आएको छ ।”

प्रतिकृया दिनुहोस