खेलकुद शनिबार, साउन ४, २०७६

वेष्ट इन्डिजविरुद्धको सिरिजमा धोनी नखेल्ने

हिमालखबर

विश्वकप क्रिकेटमा अपेक्षित प्रदर्शन गर्न नसकेको आलोचना खेपेका भारतका पूर्व कप्तान महेन्द्रसिंह धोनीले आसन्न वेष्ट इन्डिज भ्रमणमा आफू ‘उपलब्ध नहुने’ जनाएका छन् ।

महेन्द्रसिंह धोनी । तस्वीरः हिन्दुस्तान टाइम्स

धोनीले आइतबार टोलीको नामावली चयन हुनुपूर्व भारतीय क्रिकेट कन्ट्रोल बोर्ड (बीसीसीआई) लाई यस्तो जानकारी दिएको बताइएको छ ।

भारतीय सेनाको पारासुट रेजिमेन्टका मानार्थ कर्णेल धोनीले आगामी दुई महीना रेजिमेन्टका साथ बिताउने भन्दैं टोलीमा आफूलाई सहभागी नगराउन सूचित गरेको बताइएको छ ।

बीसीसीआईका अधिकारीले यसको पुष्टि गरेका छन् । धोनीले आफ्नो यो तालिकाबारे बीसीसीआईलाई पहिल्यै जानकारी गराएको पनि अधिकारीले बताएका छन् ।

विश्वकपमा सुस्त गतिमा रन बनाएको र आफ्नो भूमिकामा पूर्ण न्याय नगरेको भन्दैं धोनीले अब सन्न्यास लिनुपर्ने केही आलोचकको मत छ ।

धोनी भारतको सबैभन्दा सफल कप्तान मानिन्छन् । उनकै कप्तानीमा भारतले सन् २०११ मा दोस्रोपटक विश्वकपको उपाधि चुमेको थियो ।

प्रतिकृया दिनुहोस