मधेश मिडिया काउन्सिल अध्यक्ष भट्टराई मृत भेटिए
मधेश प्रदेशको मिडिया काउन्सिलका अध्यक्ष शिवहरि भट्टराई मृत अवस्थामा भेटिएका छन्।
पत्रकार भट्टराई सर्लाहीको लालबन्दी नगरपालिका–१३ पत्थरकोटास्थित होलिडे रिसोर्टमा शनिबार बिहान मृत भेटिएका हुन्। उनी नेपाल पत्रकार महासंघ, सर्लाही शाखाको साधारणसभामा भाग लिन लालबन्दी गएका थिए।
शुक्रबार राति खान खाएर सुतेका थिए। शनिबार बिहान साधारणसभा शुरू हुन लाग्दा पनि उनी नआएपछि खोजी शुरू भएको थियो।
जिल्ला प्रहरी कार्यालयका अनुसार, खोजबिन गर्दा रिसोर्टमा उनी बसेकै कोठामा मृत भेटिएका हुन्। उनको हातमा औषधि भेटिएको छ भने कोठामा बान्ता गरेको देखिएको छ। यसमा थप अनुसन्धान भइरहेको प्रहरीले जनाएको छ।
उनी नेपाल पत्रकार महासंघ, सप्तरी शाखा संस्थापक सभापति हुन्। त्यस्तै, नेपाल पत्रकार महासंघ पूर्व केन्द्रीय उपसभापति हुन्।
-1728374020.jpg)
