एनआरएन 'ग्लोबल नलेज' सम्मेलन भर्चुअल माध्यमबाट आजदेखि शुरू
गैह्र आवासिय नेपाली संघ (एनआरएनए)को तीन दिने ज्ञानसीप सम्मेलन आज (शुक्रबार)बाट शुरू भएको छ। कोभिड १९ संक्रमणको जोखिमका कारण भर्चुअल माध्यमबाट शुरू भएको ‘दोस्रो एनआरएन ग्लोबल नलेज कन्भेन्शन’ आजदेखि तीन दिनसम्म सञ्चालन हुनेछ।
देशको समृद्धिका लागि संसारभर छरिएर रहेका नेपालीहरूको ज्ञान र सीपलाई नेपाल भित्र्याउने उद्देश्य हित एनआरएनएले सम्मेलन आयोजना गरेको जनाएको छ। सम्मेलनमा विश्वभरका एनआरएनहरूको सहभागिता रहेको छ। सम्मेलनलाई सम्बोधन गर्दै भौतिक पूर्वाधार तथा यातायात मन्त्री वसन्तकुमार नेम्बाङ्ले संसारभर छरिएर रहेका एनआरएनहरूको ज्ञान र सीपलाई नेपालमा भित्र्याउन आग्रह गरे। उनले विदेशमा रहेका एनआरएनहरूसँग विभन्न क्षेत्रमा लगानी गर्ने क्षमता रहेकाले लगानीसँगै ज्ञान र सीपलाई समेत नेपाल भित्र्याउन आग्रह गरे। पछिल्लो समय कोभिडको महामारीका कारण अर्थतन्त्रमा चुनौति रहेकोले पनि देशको आर्थिक विकासका लागि सबै गैह्रआवासीय नेपालीको साथ आवश्यक रहेको उनले बताए।
नेपालको सहरी विकास, यातायात, रेल्वे, जलविद्युत, कृषि लगायतका क्षेत्रमा लगानी गर्न समेत मन्त्री नेम्वाङले आग्रह गरे। बैदेशिक लगानीका लागि सरकारले कानून निर्माण गरिसकेकाले लगानी भित्र्याउन योगदान गर्नपनि आग्रह गरे।
कार्यक्रममा सहभागि भएका गैह्र आवासीयन नेपालीहरूले सम्मेलनमार्फत विज्ञहरूको ज्ञान, सीप र अनुभवलाई नेपालको उद्यम सिर्जना र नीति निर्माण जस्तो काममा लगाउन सहयोग पुग्ने बताए। खासगरी सम्मेलन सूचना प्रविधि, उर्जा, कृषि, यातायात, खाद्य तथा वातावरण लगायत स्वदेशी सरोकारका विषयमा केन्द्रीत हुने पनि उनीहरूले बताए। देशबाहिर रहेका नेपालीहरू विभिन्न क्षेत्रको विशेषज्ञको रुपमा विश्वस्तरका परियोजना र कम्पनीहरूमा काम गरिरहेको भएपनि तीनको पहिचान हुन नसक्दा नेपालमा ती सीप र ज्ञान भित्रिन नसकेकाले त्यसको उजागर गर्ने उद्देश्य समेत सम्मेलनले राखेको छ। सम्मेलन आजदेखि आइतबारसम्म चल्नेछ।