समाचार मंगलबार, असार १६, २०७७

काठमाडाैं आइपुग्यो सलह, पश्चिमतिर जाने अनुमान

हिमालखबर

काठमाडाैं आइपुग्यो सलह, पश्चिमतिर जाने अनुमान

शनिबार भारतबाट नेपाल प्रवेश गरेको सलह किरा मंगलबार साँझ काठमाडौंको आकाशमा देखिएको छ ।

सलहको ठूलो हूल काठमाडौंका विभिन्न स्थानमा पूर्वबाट पश्चिमतिर गएको देखिएको थियो।

करीब पाँच-सात लाखको सङ्ख्यामा रहेको सलहको हूल स्वयम्भूमाथिबाट नागार्जुनको जङ्गलतिर गएको अनुमान गरिएको छ भने एक हूल ललितपुरतिर आएको कृषि तथा पशुपन्छी विकास मन्त्रालयअन्तर्गतको प्लान्ट क्वारेन्टाइन तथा विषादी व्यवस्थापन केन्द्रका प्रमुख सहदेवप्रसाद हुमागाईले जानकारी दिए ।

सलहको यो हूल रातभर बास बसेर पश्चिमतिर जाने अनुमान गरिएको छ।

सलहको यो हूल सिन्धुली र काभ्रेपलाञ्चोकतिरबाट आएको देखिन्छ । काठमाडौंमा आज देखिएको सलह केही दिनदेखि मकवानपुरमा रहेको सलहको ठूलो हूल हो वा नयाँ हो भन्ने यकिन आवश्यक अध्ययन गरी भोलि मात्रै भन्न सकिने उनले बताए।

मंगलबार पूर्वी दिशाबाट पश्चिमतिर बहेको हावासँगै सलह किरा पनि पश्चिमतिर सरेको अनुमान गरिएको छ । सलह किरा फट्याङ्ग्रा प्रजातिको एक झुण्डमा (चारदेखि आठ करोड सङ्ख्यामा) उडान गर्ने र ठूलो परिमाणमा खेती वा वनस्पति नष्ट गर्नसक्ने किरा हो । यो किराले हरियो वनस्पतिलाई छोटो समयमा पात र डाँठसमेत खाइदिन्छ।

प्रत्येक किराले प्रत्येक दिन आफ्नो तौल बराबर वनस्पति खाने गर्छ । त्यसैले यसको विकास छिटो हुन्छ र धेरै क्षति पुर्‍याउँछ । यो किरा झुण्डमा हुने भएकाले क्षतिको प्रतिशत बढी नै हुन्छ।

प्रतिकृया दिनुहोस