अर्थ/बजार सोमबार, असार १५, २०७७

तीन महीनापछि खुलेको शेयर बजारमा १३ अंकको गिरावट

हिमालखबर

तीन महीनापछि खुलेको शेयर बजारमा १३ अंकको गिरावट

लामो समयपछि खुलेको शेयर बजार सोमबार १२.७८ अंकले ओरालो झरेको छ।

बजार खुल्नेबित्तिकै घट्न थालेको शेयर बजार परिसूचक (नेप्से) ४० मिनेटमै ४ प्रतिशतले नकारात्मक भएपछि कारोबार २० मिनेटका लागि स्थगित गरिएको थियो । तर, फेरि बजार बढ्दै नेप्से परिसूचकले १ हजार २ सय विन्दु छोएको थियो । बजार बन्द हुँदा यो फेरि घटेर १ हजार १८८.७८ अंकमा ओर्लिएको छ।

सोमबार व्यापार, उत्पादनमूलक, अन्य र जीवन बीमा समूह बाहेकका सबै समूहका उपसूचक नकारात्मक भएका छन् । व्यापार समूह ५.२४ प्रतिशतले बढेको छ भने उत्पादनमूलक समूह ४.३१ प्रतिशतले बढेको छ । त्यस्तै, जीवन बीमा समूह ३.६५ र अन्य समूह ३.१३ प्रतिशतले बढेका छन्।

सोमबारको कारोबारमा सबैभन्दा धेरै विकास ब्यांक समूह ३.७४ र वाणिज्य ब्यांक समूह २.४२ प्रतिशतले ओरालो झरे । कारोबारमा सबैभन्दा धेरै नागरिक लगानी कोषको शेयरमा लगानी गरेका लगानीकर्ताले करीब १० प्रतिशत नाफा कमाएका छन् । हिमालयन डिस्टिलरीका लगानीकर्ताले ९.९६ र नेपाल इन्भेष्टमेन्ट ब्यांकका लगानीकर्ताले ९.९४ प्रतिशत कमाएका छन्।

सबैभन्दा धेरै गुमाउनेमा स्वावलम्बन लघुवित्तका लगानीकर्ता छन् । उनीहरुले सोमबारको कारोबारमा करीब १० प्रतिशत गुमाएका छन् । त्यस्तै, नेपाल पुनर्बीमा कम्पनीका लगानीकर्ताले पनि ९.९ प्रतिशत गुमाएका छन्।

सोमबार बजारमा १३० कम्पनीका रु.३४ करोड ७७ लाख मूल्य बराबरका ९ लाख ७० हजार कित्ता शेयर किनबेच भए । यो औसत बेलाको भन्दा असाध्यै न्यून कारोबार हो।

११ चैतमा बन्दाबन्दी शुरु भएसँगै बन्द नेपाल स्टक एक्सचेन्ज वैशाख अन्तिममा दुई दिन खुलेको थियो । दुई दिनमा नेप्से परिसूचक करीब ५० अंकले घटेपछि बजार फेरि बन्द गरिएको थियो । बजार खोल्न सरकारलाई चौतर्फी दबाब परेपछि नेपाल धितोपत्र बोर्डले आइतबार कारोबार खोल्न एक्सचेन्जलाई निर्देशन दिएको थियो।

 

प्रतिकृया दिनुहोस